اسرائیلی فضائیہ کے حدیدہ بندرگاہ پر شدید حملے، 12 فضائی کارروائیاں

 اسرائیلی فضائیہ نے یمن کے بحیرہ احمر پر واقع اہم حدیدہ بندرگاہ کو شدید فضائی حملوں کا نشانہ بنایا ہے۔ حوثی تحریک سے منسلک ٹی وی چینل المسیرہ کے مطابق، اسرائیلی طیاروں نے بندرگاہ پر کم از کم 12 فضائی حملے کیے۔
خلیج ٹائمز کے مطابق حملوں سے قبل اسرائیلی فوج نے بندرگاہ کے اطراف مقیم شہریوں کو انخلا کی ہدایت جاری کی تھی۔ حملوں کے نتیجے میں حدیدہ کے کئی علاقوں میں دھماکوں اور آگ لگنے کی اطلاعات موصول ہوئی ہیں۔

یہ کارروائی ایسے وقت میں سامنے آئی ہے جب چند روز قبل اسرائیلی افواج نے یمن کے دارالحکومت صنعا اور شمالی صوبے الجوف پر بھی فضائی حملے کیے تھے۔
حوثی عسکری ترجمان یحییٰ سریع نے دعویٰ کیا ہے کہ یمنی فضائی دفاع اسرائیلی جارحیت کا بھرپور مقابلہ کر رہا ہے۔ ان کا کہنا تھا کہ ہم دشمن طیاروں کی جارحیت کا سامنا کر رہے ہیں اور اس کا جواب دیا جائے گا۔
واضح رہے کہ حوثی تحریک، جو یمن کے سب سے زیادہ آباد علاقوں پر قابض ہے، نے حالیہ ہفتوں میں بحیرہ احمر میں کئی تجارتی جہازوں کو نشانہ بنایا ہے۔ حوثیوں کا موقف ہے کہ یہ کارروائیاں غزہ میں محصور فلسطینی عوام کے ساتھ اظہارِ یکجہتی کے طور پر کی جارہی ہیں۔

اسرائیل کا کہنا ہے کہ حوثی حملوں کے جواب میں یمن کے حوثی کنٹرول والے علاقوں کو نشانہ بنایا جارہا ہے، جن میں اس بار حدیدہ بندرگاہ بھی شامل ہے۔