پنجاب میں سیلاب سے 6 لاکھ ایکڑ چاول کی فصل متاثر

پنجاب میں حالیہ سیلاب کے باعث زرعی شعبہ شدید متاثر ہوا ہے، جہاں سب سے زیادہ نقصان چاول کی فصل کو پہنچا ہے، جو تقریباً 6 لاکھ ایکڑ رقبے پر پھیلی ہوئی تھی۔

یہ بات سیکرٹری زراعت پنجاب افتخار علی سہو کی زیر صدارت ہونے والے اجلاس میں بتائی گئی، جس میں سیلاب سے ہونے والے زرعی نقصانات کا جائزہ لیا گیا۔ اجلاس میں بریفنگ دیتے ہوئے افتخار سہو نے بتایا کہ سیلاب نے پنجاب کے 28 اضلاع کی فصلوں کو نقصان پہنچایا ہے، جب کہ مجموعی طور پر 3 ہزار سے زائد دیہات اس قدرتی آفت سے متاثر ہوئے ہیں۔

نقصانات کا درست تخمینہ لگانے کے لیے 2 ہزار سے زائد سروے ٹیمیں تشکیل دے دی گئی ہیں جو زمینی حقائق پر مبنی رپورٹ پیش کریں گی۔

سیکرٹری زراعت کا مزید کہنا تھا کہ کپاس کی فصل کو نسبتاً کم نقصان ہوا ہے، جبکہ چاول کی فصل سب سے زیادہ متاثر ہوئی ہے۔ انہوں نے بتایا کہ وزیراعلیٰ پنجاب جلد ہی متاثرہ کسانوں کے لیے خصوصی مالی امدادی پیکج کا اعلان کریں گی، تاکہ زرعی شعبے کی بحالی ممکن ہو سکے۔