ملک میں پیٹرولیم مصنوعات اور بجلی کی قیمتوں میں ایک بار پھر اضافے کا امکان

ملک میں پیٹرولیم مصنوعات اور بجلی کی قیمتوں میں ایک بار پھر اضافے کا امکان ہے۔

میڈیا رپورٹس کے مطابق پیٹرولیم مصنوعات کی قیمتوں میں ایک روپیہ 97 پیسے سے 4 روپے 65 پیسے فی لیٹر تک اضافہ ہو سکتا ہے۔ پیٹرول ایک روپیہ 97 پیسے فی لیٹرمہنگا ہو سکتا ہے جبکہ ہائی اسپیڈ ڈیزل 2 روپے 48 پیسے فی لیٹر مہنگا ہونے کا امکان ہے۔

اس کے علاوہ لائٹ ڈیزل آئل ایک روپیہ 76 پیسے فی لیٹر مہنگا ہو سکتا ہے، مٹی کے تیل کی قیمت میں 4 روپے 65 پیسے فی لیٹر اضافے کی توقع ہے۔اوگرا قیمتوں کے حوالے سے سمری پیٹرولیم ڈویژن کے ذریعے وزارت خزانہ کو بھیجے گی، نئی قیمتوں کا اعلان وزیراعظم کی حتمی منظوری کے بعد کیا جائے گا۔

اس سے قبل 16 ستمبر کو حکومت کی جانب پیٹرول کی قیمت میں کوئی ردو بدل نہیں کیا گیا تھا جبکہ ہائی اسپیڈ ڈیزل کی قیمت میں 2 روپے 78 پیسے فی لیٹر اضافہ کیا گیا تھا۔

دوسری طرف ملک میں ایک ماہ کے لئے بجلی مہنگی ہونے کا امکان ہے۔ سنٹرل پاور پرچیزنگ ایجنسی (سی پی پی اے) نے اگست کے فیول پرائس ایڈجسٹمنٹ کی درخواست کی تھی جس پر نیپرا آج سماعت کرے گا۔

سی پی پی اے کی جانب سے ماہ اگست کیلئے فیول پرائس ایڈجسٹمنٹ کی مد میں 19 پیسے فی یونٹ اضافہ کی درخواست کی گئی تھی،سی پی پی اے کے مطابق اگست میں ڈسکوز کو 102.94 ارب یونٹ فراہم کے گئے۔

درخواست میں کہا گیا ہے کہ اگست میں بجلی کی مجموعی پیداوار 7.31 روپے فی یونٹ کے برعکس 7.50روپے فی یونٹ رہی، سی پی پی اے کے مطابق مقامی کوئلے سے بجلی کی پیداواری لاگت 12.01 روپے فی یونٹ رہی جبکہ درآمدی کوئلے سے بجلی کی پیداواری لاگت 14.07 روپے یونٹ رہی۔

درخواست میں نیپرا کو بتایا گیا کہ فرنس آئس سے بجلی کی پیداوار 33 روپے اور گیس سے بجلی کی پیداوار 13.43 روپے فی یونٹ رہی جبکہ ایل این جی سے بجلی کی پیداواری لاگت 21.73 روپے فی یونٹ رہی۔

سی پی پی اے کی جانب سے فیول پرائس ایڈجسٹمنٹ کی مد میں فی یونٹ قیمت میں اضافے کی درخواست پر نیپرا اتھارٹی آج فیصلہ کرے گی۔