افغان طالبان اورخارجی دہشتگردوں کا گٹھ جوڑ بے نقاب، گرفتار خودکش بمبار کے ہوشربا انکشافات

جنوبی وزیرستان :  فرنٹیئر کور (ایف سی) نے خیبر پختونخوا کے علاقے جنوبی وزیرستان میں کارروائی کرتے ہوئے خودکش بمبار کو گرفتار کر لیا۔

تفصیلات کے مطابق سیکیورٹی ذرائع کا کہنا ہے کہ جنوبی وزیرستان سے گرفتار ہونے والے خودکش بمبار نے افغان طالبان اور فتنہ الخوارج کے گٹھ جوڑ کو بے نقاب کرتے ہوئے ہوشربا انکشاف کر دیئے۔

سیکیورٹی ذرائع کے مطابق افغان طالبان کم عمر افغان نوجوانوں کو دہشتگردی کے لیے استعمال کر رہے ہیں۔

ذرائع کے مطابق گرفتار خود کش بمبار کی شناخت نعمت اللہ ولد موسیٰ جان کے نام سے ہوئی اور وہ افغانستان کے صوبے قندھار کا رہائشی ہے،خود کش بمبار نے اعترافی بیان میں ہوشربا انکشافات کیے،گرفتار خودکش بمبار قندھار جوہریہ مدرسہ کا طالب علم ہے، اور قرآن پاک حفظ کر رہا ہے۔

گرفتار خودکش بمبار نعمت اللہ نے اعترافی بیان میں کہا کہ مدرسہ میں موجود کچھ لوگوں نے مجھے کہاکہ پاکستانی فوج کے خلاف جہاد جائز ہے، ہم 40 لوگ خوست میں اکٹھے ہوئے اور براستہ چیوار پاکستان میں داخل ہو ئے۔

ذرائع کے مطابق خودکش بمبار نے کہا کہ ہمارا کمانڈر ہمیں خودکش حملوں کی تربیت دیتا تھا۔ جس کا دورانیہ تین ماہ ہوتا تھا۔ لیکن میں نے ایک ہفتے کی تربیت لی۔

بمبار نے مزید کہا کہ تربیت میں ہمیں سکھایا گیا کہ گاڑی پر خود کش حملہ کیسے کرنا ہے ؟ اور یہ بھی تربیت دی گئی کہ چیک پوسٹ پر اور فوج پر کیسے خود کش حملہ کرنا ہے،انہوں نے کہا کہ ہمارے گروپ میں 18، 20 اور22 سال کی عمر کے 20 نوجوان شامل تھے۔ جبکہ میں نے تربیت کے دوران وہاں اذان کی آواز سنی۔ تو مجھے احساس ہوا کہ پاکستانی فوج بھی مسلمان ہے اور اس پر خودکش حملہ کرنا حرام ہے۔

ذرائع کے مطابق خود کش بمبار کے انکشافات ثبوت ہیں کہ افغان طالبان نوجوانوں کی ذہن سازی کر رہے ہیں۔ اور نوجوانوں کو افواج پاکستان کے خلاف دہشتگردانہ سرگرمیوں پر اُکسایا جاتا ہے۔

واضح رہے کہ افغانستان میں بیٹھے کالعدم گروپ پاکستان میں دہشتگردی کررہے ہیں، پاکستان افغان عبوری حکومت سے بار ہا یہ مطالبہ کر چکا ہے کہ اپنی سرزمین ہمارے خلاف دہشتگردی کے لیے استعمال ہونے کی اجازت نہ دی جائے۔