کُرم:دہشتگردوںکا پولیس چیک پوسٹ پر حملہ ، جوابی کارروائی میں 4 خارجی جہنم واصل،دو اہلکار شہید

کرم: صوبہ خیبر پختونخوا کے علاقے کرم میں خارجی دہشتگردوں کے پولیس چیک پوسٹ پر حملہ کر دیا جسے پولیس نے بروقت جوابی کارروائی کرتے ہوئے ناکام بنادیا۔

ڈسٹرکٹ پولیس آفیسر(ڈی پی او) کُرم کے مطابق پولیس کی جوابی کارروائی میں 4 دہشت گرد جہنم واصل اور 6 زخمی ہوگئے جب کہ فائرنگ کے تبادلے میں پولیس کے 2 جوانوں نے بھی جامِ شہادت نوش کیا۔

علاوہ ازیں مقامی ذرائع کا کہنا تھا کہ دہشت گردوں نے چنارک تھانے کی چیک پوسٹ نذر آتش کر دی، فتنہ الخوارج کے دہشت گردوں اور پولیس کے درمیان فائرنگ کا تبادلہ کئی گھنٹے جاری رہا۔

ڈی پی او کُرم نے مزید بتایا کہ علاقے میں پولیس کی مزید  نفری روانہ کی گئی جس نے تین گھنٹے مسلسل دلیری سے مقابلہ کیا۔

محسن نقوی کا پولیس کو خراج عقیدت

دوسری جانب وفاقی وزیر داخلہ محسن نقوی کا4  دہشت گردوں کو جہنم رسید کرنے پر پولیس کی پیشہ ورانہ صلاحیتوں کو سراہتے ہوئے کہنا تھا کہ بہادر پولیس اہلکاروں نے بروقت کارروائی کرکے فتنہ الخوارج کے ناپاک عزائم کو ناکام بنایا۔

محسن نقوی نے دہشت گردوں کے خلاف بہادری سے لڑتے ہوئے جامِ شہادت نوش کرنے والے 2 پولیس اہلکاروں کو خراج عقیدت پیش کیا اور لواحقین سے دلی ہمدردی و اظہار تعزیت کیا۔