عظمیٰ خان کو اڈیالہ جیل میں بانی پی ٹی آئی سے ملاقات کی اجازت مل گئی

راولپنڈی: بانی پی ٹی آئی کی بہن ڈاکٹرعظمیٰ خانم کو عمران خان سے ملاقات کی اجازت مل گئی۔

تفصیلات کے مطابق ڈاکٹرعظمیٰ خانم کچھ دیر میں فیکٹری ناکے سے گیٹ نمبر 5کیلئے روانہ ہوں گی۔

واضح رہے کہ عمران خان سے آج وکلا اور اہل خانہ کی ملاقات کا دن ہے، اڈیالہ جیل کے اطراف اور مختلف مقامات پر پولیس کی بھاری نفری تعینات ہے جبکہ گورکھپور بائی گل اور ملحقہ آبادیوں میں سرکاری اور نجی تعلیمی اداروں میں چھٹی ہے۔

چیئرمین پی ٹی آئی بیرسٹر گوہر پر مشتمل وکلا کی 6 رکنی ٹیم بانی پی ٹی آئی سے ملاقات کیلئے آج اڈیالہ جیل پہنچیں گی، علیمہ خانم اور پی ٹی آئی قیادت نے ملاقات تک احتجاج اور دھرنے کا اعلان کر رکھا ہے۔

پی ٹی آئی رہنماؤں نے آج پارلیمنٹ ہاؤس کے باہر احتجاج کرتے ہوئے عمران خان کی رہائی کا مطالبہ کیا۔

پارٹی کارکنان  کے اجلاس میں سہیل آفریدی نے کہا کہ منگل کو بھی بانی پی ٹی آئی عمران خان سے ملاقات کے لیے جائیں گے۔ لیکن اگر اس دن بھی ملاقات کے لیے نہیں چھوڑا گیا۔ تو آگے کے لائحہ عمل کا اعلان کیا جائے گا۔

انہوں نے  منگل کو ہر ضلع، گاؤں اور یونین کونسل سے کارکنان کو اڈیالہ جیل پہنچنے کی ہدایت بھی کی تھی۔