کون ہو گا وزیراعظم آزاد کشمیر ؟وزیراعظم نے اہم اجلاس آج طلب کرلیا

اجلاس میں آزاد کشمیر سے نو منتخب  ارکان اسمبلی کو بلایا گیا ہے۔وزیراعظم کے پاس انٹرویو کے لیے جانے والوں میں بیرسٹر سلطان محمود اور سردار تنویر الیاس شامل ہیں جبکہ خواجہ فاروق اور اظہر صادق کو بھی بلا لیا گیا۔ مشاورتی اجلاس میں حکومت سازی میں مسلم کانفرنس اور جموں و کشمیر پی پی کے کردار پر غور ہو گا۔ اجلاس میں کشمیر میں صدر، وزیراعظم، سپیکر و ڈپٹی سپیکر  کے ناموں پر غور کیا جائے گا۔آزاد کشمیر کی 8 مخصوص نشستوں کے امیدواروں کا فیصلہ کیا جائے گا۔

بیرسٹر سلطان محمود چوہدری مسلسل نویں مرتبہ رکن اسمبلی منتخب ہوئے ہیں۔ وہ تحریک انصاف کے ٹکٹ پر مسلسل تیسری مرتبہ رکن اسمبلی منتخب ہوئے ہیں۔ اگلے وزیراعظم کےلیے سابق وزیراعظم آزاد کشمیر بیرسٹر سلطان محمود چوہدری اور سردار تنویر الیاس میں بھی سخت مقابلہ ہے۔

واضح رہےکہ تحریک انصاف نے آزاد کشمیر کے انتخابات میں 25 نشستیں جیت کر سادہ اکثریت حاصل کی ہے۔ پیپلزپارٹی 11 نشستیں لے کر دوسرے اور (ن) لیگ 6 نشستوں کے ساتھ تیسرے نمبر پر ہے۔