اسحاق ڈارکا یورپی یونین کی نائب صدر سے ٹیلیفونک رابطہ، مکالمے اور باہمی روابط کے فروغ کے عزم کا اعادہ 

اسلام آباد: نائب وزیراعظم و وزیر خارجہ سینیٹر محمد اسحاق ڈار نے آج یورپی یونین کی نائب صدر اور ہائی ریپریزنٹیٹو کاجا کالاس سے ٹیلیفونک گفتگو کی۔

ترجمان دفتر خارجہ کے مطابق ٹیلیفونک گفتگو کے دوران خطے کی بدلتی ہوئی صورتحال اور اس کے معاشی و دیگر وسیع تر اثرات پر تبادلہ خیال کیا گیا۔ یورپی یونین کی اعلیٰ نمائندہ نے خطے میں امن و استحکام کے فروغ کے لیے پاکستان کے مسلسل تعمیری اور سہولت کار کردار کو سراہا۔

ترجمان نے مزید بتایا کہ رابطے کے دوران نائب وزیراعظم و وزیر خارجہ نے اس حوالے سے پاکستان کے مکالمے اور باہمی روابط کے فروغ کے عزم کا اعادہ کیا۔

انہوں نے اسلام آباد میں یورپی یونین-پاکستان بزنس فورم کے کامیاب انعقاد کو بھی سراہتے ہوئے کہا کہ اس سے شراکت داری مضبوط بنانے اور کاروباری مواقع پیدا کرنے میں مدد ملے گی۔

ترجمان کے مطابق دونوں رہنماؤں نے قریبی رابطے میں رہنے پر اتفاق کیا۔