عمران خان کو کسی سے کوئی خطرہ نہیں :شیخ رشید

تفصیلات کے مطابق میڈیا سے گفتگو کرتے ہوئے شیخ رشید کا کہنا ہے کہ ن لیگ اورش لیگ 2 جماعتیں ہیں اقتدار کے بھوکوں کو کوئی پذیرائی نہیں مل رہی،5 اگست کوملک بھر میں یوم استحصال منائیں گے ،عمران خان کو پیپلزپارٹی یا ن لیگ سے کوئی خطرہ نہیں ہے ۔

انہوں کہا کہ افغان سفیر کی بیٹی کے کیس پر افغان ٹیم کا وزارت داخلہ سے رابطہ ہے، افغان ٹیم چاہے تو 7 لوگوں کے انٹرویو بھی کرسکتی ہے جب کہ  آئی جی کو ہدایت کی ہے اپنی تحقیقاتی رپورٹ افغان ٹیم کو دیں ۔

وزیر داخلہ کا کہنا تھا کہ چائنیز کی سکیورٹی کے لیے تمام فول پروف انتظامات ہیں جب کہ داسو ڈیم پر تفتیش آگے بڑھی ہے، ابھی کوئی بات نہیں کرسکتا۔

 نورمقدم کیس کے حوالے سے گفتگو کرتے ہوئے ان کا کہنا تھا کہ کیس میں تمام شواہد اکٹھے ہیں،  ملزم کو پولیس مقابلے میں تو نہیں مروا سکتا، ملزم کے باپ اور ڈرائیور کو بھی اندرکیاہے، جن سے جعفر کی بات ہوئی انہیں بھی اندر کیا ہے، پیچھےکسی کو نہیں چھوڑا، اب فیصلہ عدالت کا ہے، شہادتیں پوری ہیں اور مجھے پوری امید ہے ملزم کوسزائے موت ہوگی۔

شیخ رشید کا مزید کہنا تھا کہ ملک میں بغیر ویزے ہزاروں لوگ چھپے ہوئے ہیں، یہ لوگ ایک ماہ میں آن لائن ویزہ اپلائی کردیں ورنہ ملک چھوڑ دیں۔