پاک فوج ملک میں ہاکی سمیت تمام کھیلوں کے فروغ کیلئے کوشاں

لاہور :پاک فوج ملک میں ہاکی سمیت تمام کھیلوں کے فروغ کے لیے کوشاں ہے۔

تفصیلات کے مطابق لاہور میں پاک فوج کے زیر اہتمام تیسری چیف آف آرمی سٹاف انٹر کلب نیشنل ہاکی چیمپئن شپ 2026 کا انعقاد کیا گیا۔نیشنل لیول ہاکی چیمپئن شپ کا فائنل باچا خان ہاکی کلب بنوں اور رانا مجاہد علی ہاکی کلب فیصل آباد کے درمیان کھیلا گیا۔ 

سنسنی خیز مقابلے کے بعد باچا خان ہاکی کلب بنوں نے تین کے مقابلے میں پانچ گول کرکے ٹائٹل اپنے نام کرلیا۔فائنل میچ دیکھنے کے لیے سابق اولمپئنز اور ہاکی شائقین کی بڑی تعداد موجود تھی۔ کھیل کے اختتام پر مہمانِ خصوصی، جی او سی محفوظ گیریژن نے کھلاڑیوں کی حوصلہ افزائی کی اور انعامات تقسیم کیے۔

اس موقع پر سابق اولمپئنز کا کہنا تھا کہ ٹیلنٹ ہنٹ پروگرام کے تحت ملک میں ہاکی کا مستقبل ایک بار پھر روشن ہوتا دکھائی دے رہا ہے۔ ان کے مطابق ایسے ایونٹس ملک میں ہاکی کا نیا ٹیلنٹ سامنے لانے میں انتہائی اہم ثابت ہوں گے۔

دوسری جانب شائقین نے ملک میں ہاکی کے فروغ کے لیے چیمپئن شپ کے انعقاد پر پاک فوج کا شکریہ ادا کیا۔