ایران نے جوابی حملہ کر دیا، اسرائیل کے متعدد علاقوں میں سائرن کی آوازیں

تہران: ایران نے امریکی و اسرائیلی جارحیت کے جواب میں صہیونی ریاست پر میزا ئل حملہ کر دیا ہے جس کے بعد اسرائیل کے متعدد علاقوں میں سائرن کی آوازیں سنائی دی رہی ہیں۔
تفصیلات کے مطابق اسرائیلی فوج کا کہنا ہے کہ ایران نے اسرائیل پر میزائل حملہ کردیا ہے، خطرے کو روکنے کے لیے دفاعی نظام متحرک ہیں، میزائلوں کو روکنے کی کوشش کر رہے ہیں۔
صہیونی میڈیا رپورٹس کے مطابق اسرائیلی فوج کا کہنا ہے کہ ایران کی جانب سے اسرائیل کی طرف داغے گئے میزائلوں کی نشاندہی کے بعد ملک کے کئی علاقوں میں سائرن بجا دیے ہیں۔

اسرائیلی فوج کے بیان میں کہا گیا ہے کہ عوام فوری طور پر ہوم فرنٹ کمانڈ کی ہدایات پر عمل کریں۔ فوج کے مطابق اسرائیلی فضائیہ خطرات کو روکنے اور جہاں ضرورت ہو وہاں کارروائی کرنے میں مصروف ہے تاکہ ممکنہ نقصان کو کم سے کم کیا جا سکے۔

صہیونی فوج نے مزید کہا  دفاعی نظام مکمل طور پر ناقابلِ تسخیر نہیں ہوتا، اس لیے شہریوں کے لیے ضروری ہے کہ وہ جاری کردہ حفاظتی ہدایات پر سختی سے عمل کریں۔ حکام نے لوگوں سے کہا ہے کہ وہ پناہ گاہوں کے قریب رہیں اور غیر ضروری نقل و حرکت سے گریز کریں۔

خیال رہے کہ اس سے قبل امریکا اور اسرائیل کے حملے کے بعد ایران کا ردعمل سامنے آیا تھا جس میں ایرانی حکام کا کہنا تھا کہ حملوں کا سخت جواب دیں گے، حملوں میں متعدد وزارتوں کو نشانہ بنایا گیا ہے۔
ایرانی حکام کے مطابق حملے حساس سرکاری تنصیبات پر کیے گئے، جس کے بعد سیکیورٹی ہائی الرٹ کر دی گئی ہے، جوابی کارروائی کی تیاری کررہے ہیں۔
ایرانی میڈیا کا کہنا ہے کہ ایران کے مغربی شہر ایلام میں دھماکوں کی آوازیں سنی گئی ہیں، ابھی جانی نقصان کے بارے میں تفصیلات سامنے نہیں آئی ہیں۔
دوسری جانب حملے کے بعد صدر ٹرمپ کا کہنا ہے کہ ایران طویل فاصلے تک مار کرنے والے میزائل تیار کر رہا ہے جو امریکہ اور دیگر کو خطرہ پہنچا سکتے ہیں،امریکی صدر نے کہا کہ ایرانی بحریہ کو مکمل طور پر ختم کر دیں گے۔