خطے میں کشیدگی کے باعث وزیراعظم کا دو روزہ دورہ روس منسوخ، سیکیورٹی صورتحال پر ہنگامی اجلاس طلب

اسلام آباد: ایران پر امریکی و اسرائیلی حملے کے بعد خطے کی بدلتی صورت حال کے پیش نظر وزیراعظم شہباز شریف کا دو روزہ دورہ روس منسوخ کر دیا گیا، سکیورٹی صورتحال پر ہنگامی اجلاس طلب کر لیا گیا۔

ذرائع کا کہنا ہے کہ وزیراعظم شہباز شریف مشرق وسطیٰ کی بگڑتی صورتحال کے باعث روس نہیں جا رہے،وزیراعظم شہباز شریف نے پیر کو روس روانہ ہونا تھا، وزیراعظم کا دورہ غیر معمولی صورتحال کے تناظر میں منسوخ کیا گیا ہے۔

ذرائع نے مزید بتایا کہ وزیراعظم شہبازشریف نےخطے کی موجودہ سکیورٹی صورتحال پر اجلاس طلب کرلیا، اجلاس میں اعلیٰ عسکری قیادت اورانٹیلی جنس اداروں کے سربراہان شریک ہوں گے۔

ذرائع کے مطابق اجلاس میں افغانستان،ایران سمیت خطےکےدیگر ممالک کی سکیورٹی صورتحال پرغور کیا جائے گا،جبکہ موجودہ صورتحال میں پاکستان کی پالیسی کے حوالے سے اہم مشاورت ہوگی، آنے والے دنوں میں پاکستان اپنے موقف کے حوالے سے گائیڈلائن بھی مرتب کرے گا۔

واضح رہے کہ ایران کے سرکاری میڈیا نے سپریم لیڈرکی شہادت کی تصدیق کردی،سپریم لیڈرکی شہادت پرایرانی حکومت  نے 40روز کےسوگ کااعلان کردیا۔

ایرانی سرکاری میڈیا کے مطابق سپریم لیڈرآیت اللہ خامنہ ای اپنے دفتر میں شہید ہوئے،شہادت کے وقت آیت اللہ خامنہ ای فرائض سرانجام دےرہے تھے۔