آپریشن غضب للحق جاری، سیکیورٹی فورسز کاافغان طالبان کی مرکزی پوسٹ پر کنٹرول حاصل

راولپنڈی: سیکیورٹی ذرائع کا کہنا ہے کہ پاک افغان سرحد پر کشیدگی کے بعد پاک فوج نے”آپریشن غضب للحق”کے تحت مؤثر جوابی کارروائی کرتے ہوئے افغان سرحدی علاقے میں پیش قدمی کی۔

سیکیورٹی ذرائع کا کہنا ہے کہ 28 فروری کو پاکستانی جوانوں کی افغانستان کے اندر کارروائی کی خصوصی ویڈیو بھی منظرِ عام پر آئی ہے،جوانوں نے شمالی وزیرستان سے ملحقہ سرحدی باڑ عبور کرتے ہوئے افغان طالبان کی ایک مرکزی پوسٹ کی جانب پیش قدمی کی۔

پاک فوج کی موجودگی دیکھتے ہی افغان طالبان فرار ہونے لگے۔ فورسز نے مؤثر جوابی کارروائی کے دوران افغان طالبان کے کمپاؤنڈز کلیئر کر کے دشمن کے جھنڈے اُتار دیے۔

سیکیورٹی ذرائع کے مطابق آپریشن غضب للحق تاحال جاری ہے اور اپنے اہداف حاصل ہونے تک جاری رہے گا۔

خیال رہے کہ جمعرات کی رات پاک افغان سرحد پر افغان طالبان کی جانب سے بلا اشتعال جارحیت کے جواب میں پاکستان کی مسلح افواج کا آپریشن غضب للحق جاری ہے۔

 پاک فوج نے افغانستان کی حدود کے اندر مختلف مقامات پر جوابی کارروائیاں کیں اورکابل، قندھار اور پکتیا سمیت دیگر مقامات پر موجود عسکری تنصیبات کو نشانہ بنایا اور کئی چیک پوسٹیں تباہ کیں۔