جھل مگسی:مسافر کوچ الٹنے سے  8افراد جاں بحق، 30زخمی

صوبہ بلوچستان کے ضلع جھل مگسی میں ایم ایٹ شاہراہ پر مسافر کوچ الٹنے سے 8افراد جاں بحق جبکہ 30 زخمی ہو گئے، حادثے میں خواتین اور بچے بھی متاثر ہوئے ہیں۔

میڈیا رپورٹس کے مطابق حادثہ اس وقت پیش آیا جب خاران سے لاڑکانہ جانے والی مسافر کوچ ایم ایٹ شاہراہ پر بے قابو ہو کر الٹ گئی۔

اس حوالے سے ڈی ایس پی محمد یونس نے بتایا کہ 7افراد موقع پر ہی جاں بحق ہو گئے جبکہ ایک زخمی اسپتال میں دورانِ علاج دم توڑ گیا،ڈسٹرکٹ ہیلتھ آفیسر کے مطابق حادثے میں 22 افراد زخمی ہوئے جن میں بعض کی حالت تشویشناک بتائی جا رہی ہے۔

حکام کا کہنا ہے کہ زخمیوں کو فوری طور پر قریبی اسپتال منتقل کر دیا گیا جہاں انہیں طبی امداد فراہم کی جا رہی ہے۔

دوسری جانب وزیراعلیٰ سندھ مراد علی شاہ نے بلوچستان کے علاقے جھل مگسی میں مسافر کوچ حادثے پر گہرے دکھ و افسوس کا اظہارکیا۔مراد علی شاہ نے حادثے میں قیمتی جانی نقصان پر متاثرہ خاندانوں سے دلی تعزیت کیا۔

وزیراعلیٰ سندھ نے جاں بحق ہونے والوں کی مغفرت اور زخمیوں کی جلد صحت یابی کے لیے دعا  کی۔وزیراعلیٰ سندھ نے کہاکہ اگر ضرورت ہو تو زخمیوں کو کراچی کے ہسپتالوں میں منتقل کیا جائے، سندھ حکومت متاثرہ خاندانوں کے ساتھ کھڑی ہے، ہر ممکن تعاون کیا جائے گا۔