علاقائی فورم اجلاس: پاکستان، سعودی عرب، ترکیہ اور مصر کا علاقائی تعاون مزید مضبوط بنانے پر اتفاق

قاہرہ: نائب وزیراعظم و وزیر خارجہ سینیٹر محمد اسحاق ڈار نے آج مصر کے دارالحکومت قاہرہ میں پاکستان، سعودی عرب، ترکیہ اور مصر کے وزرائے خارجہ کے علاقائی فورم (R-4) کے چوتھے اجلاس میں شرکت کی۔

تفصیلات کے مطابق اجلاس کے دوران وزرائے خارجہ نے اسلام آباد مفاہمتی یادداشت (MoU) پر ہونے والی پیش رفت کا جائزہ لیا، اہم علاقائی اور عالمی امور پر تبادلہ خیال کیا اور خطے میں امن، استحکام اور خوشحالی کے فروغ کے لیے مذاکرات، سفارت کاری اور مشترکہ کوششوں کے عزم کا اعادہ کیا۔

ملاقات میں آر-4 فریم ورک کے تحت باہمی رابطوں کو مزید مضبوط بنانے اور مشترکہ چیلنجز و مواقع سے نمٹنے کے لیے عملی تعاون بڑھانے پر بھی غور کیا گیا۔

علاوہ ازاں اجلاس کے موقع پر نائب وزیراعظم و وزیر خارجہ اسحاق ڈار نے مصر کے صدر عبدالفتاح السیسی سے بھی ملاقات کی۔ اس ملاقات میں دوطرفہ تعلقات کے علاوہ علاقائی صورتحال اور آر-4 پلیٹ فارم کے تحت تعاون کے مختلف پہلوؤں پر تبادلہ خیال کیا گیا۔

پاکستان، سعودی عرب، ترکیہ اور مصر نے باہمی شراکت داری کو مزید مستحکم بنانے، سفارتی روابط کو فروغ دینے اور ایک پرامن، مستحکم اور باہم مربوط خطے کے قیام کے لیے مشترکہ اتفاقِ رائے پیدا کرنے کے عزم کا اظہار کیا،اجلاس کے اختتام پر ایک مشترکہ اعلامیہ بھی جاری کیا گیا۔