غیرملکی خواتین مبینہ زیادتی کیس: جوڈیشل مجسٹریٹ کی رہائش گاہ میں مبینہ دباؤ، ایس ایچ او سمیت اہلکاروں کے خلاف مقدمہ درج

لاہور(سرفراز احمد): لاہور میں غیرملکی خواتین کے مبینہ اغوا اور زیادتی کے کیس میں اہم پیش رفت سامنے آئی ہے۔ پولیس نے جوڈیشل مجسٹریٹ کی سرکاری رہائش گاہ میں مبینہ طور پر غیرقانونی داخل ہونے اور دباؤ ڈالنے کے الزام میں ڈیفنس سی تھانے کے ایس ایچ او فریاد اشرف سمیت دو اہلکاروں کے خلاف مقدمہ درج کر لیا ہے۔

پولیس کے مطابق مقدمہ جوڈیشل ریسٹ ہاؤس دھرم پورہ کے چوکیدار کی مدعیت میں درج کیا گیا، جس میں سرکاری رہائش گاہ میں غیرقانونی داخلے، دھمکیاں دینے اور دیگر متعلقہ دفعات شامل کی گئی ہیں۔

ایف آئی آر کے متن کے مطابق ایس ایچ او اور دو اہلکار مبینہ طور پر اسلحہ سمیت عدالتی افسر کی سرکاری رہائش گاہ میں داخل ہوئے اور اہلکاروں نے مبینہ طور پر دباؤ ڈالنے کی کوشش بھی کی۔

ذرائع کے مطابق واقعے کے بعد ایس ایچ او ڈیفنس سی کو کلوز لائن کر دیا گیا ہے، جبکہ آئی جی پنجاب کو بھی متعلقہ اہلکاروں کے خلاف کارروائی کی درخواست دی گئی ہے۔

دوسری جانب غیرملکی خواتین کے مبینہ زیادتی کیس میں متاثرہ خواتین میڈیکل معائنے کے بعد اپنے ملک واپس روانہ ہو چکی ہیں۔ پولیس ذرائع کا کہنا ہے کہ میڈیکل رپورٹ موصول ہو گئی ہے، تاہم تفتیشی مفاد کے پیش نظر اسے خفیہ رکھا گیا ہے۔

ترجمان پولیس کے مطابق ملزمان کو عدالت میں پیش کرکے پانچ روزہ جسمانی ریمانڈ حاصل کیا گیا ہے، جبکہ جدید تفتیشی تقاضوں کے مطابق مزید شواہد اکٹھے کیے جا رہے ہیں۔ پولیس کا کہنا ہے کہ میڈیکل رپورٹ اور دیگر شواہد کی روشنی میں تحقیقات مکمل کی جائیں گی اور حتمی فیصلہ عدالت شواہد کی بنیاد پر کرے گی۔

ڈی آئی جی انویسٹی گیشن سید ذیشان رضا نے کہا ہے کہ قانون اپنا راستہ لے گا اور تمام پہلوؤں پر غیرجانبدارانہ تحقیقات جاری ہیں۔ ان کا کہنا تھا کہ متاثرہ خواتین کو مکمل قانونی معاونت فراہم کی جا رہی ہے اور غیرملکی شہریوں کا تحفظ ریاست کی ذمہ داری اور اولین ترجیح ہے۔