پنجاب کے مختلف شہروں میں تھیٹرز کے خلاف بڑا ایکشن، 8 اداکاراؤں پر پابندی

عبدالسلام علی سے

لاہور: پنجاب کے مختلف شہروں میں تھیٹرز پر غیر اخلاقی پرفارمنسز اور ایس او پیز کی خلاف ورزی کے خلاف محکمہ اطلاعات و ثقافت پنجاب نے بڑا ایکشن لیتے ہوئے آٹھ اداکاراؤں پر پابندی عائد کر دی۔

پابندی کا سامنا کرنے والی اداکاراؤں میں ماہی راجپوت، حنا شیخ، ملائیکہ شہزادی، مدیحہ خان، مہک نور، مانو ملتانی، رائمہ مہر اور حسنہ جٹ شامل ہیں۔

محکمہ اطلاعات و ثقافت پنجاب کے مطابق غیر اخلاقی رقص اور تھیٹرز میں ایس او پیز کی خلاف ورزی پر مانیٹرنگ ٹیموں کی رپورٹس کی بنیاد پر کارروائی کی گئی ہے۔

ڈائریکٹر آپریشنز پنجاب آرٹس کونسل مغیث بن عزیز نے کہا کہ مانیٹرنگ رپورٹس کی بنیاد پر مذکورہ اداکاراؤں کے خلاف کارروائی کی جا رہی ہے۔

دوسری جانب خانیوال کے میلوڈی تھیٹر میں بھی غیر قانونی سرگرمیوں کا سلسلہ جاری رہنے کا انکشاف ہوا ہے، جہاں اس سے قبل کوئی مؤثر یا ٹھوس کارروائی نہیں کی گئی تھی۔

مجاز اتھارٹی نے محکمہ اطلاعات و ثقافت پنجاب کی جانب سے جاری کردہ مخصوص ہدایات کے باوجود تھیٹر میں مسلسل جاری غیر قانونی سرگرمیوں کا سنجیدگی سے نوٹس لیا۔

بعد ازاں حکام نے کارروائی کرتے ہوئے میلوڈی تھیٹر، خانیوال کو سیل کر دیا۔