حکومت کے خلاف ترین گروپ نے بڑی میٹنگ بلا لی

ذرائع کے مطابق  حکومت کے خلاف ترین گروپ نے بڑی میٹنگ بلا لی ہے،گروپ میٹنگ تین روز کیلئے مری میں بلائی گئی ہے ۔ترین گروپ کی میٹنگ آٹھ سے دس اگست کو ہوگی۔ جہانگیر ترین گروپ کے تمام اراکین قومی و صوبائی اسمبلی کو کال کرلیا گیا۔

ذرائع ترین گروپ کا کہنا ہے کہ تین روزہ میٹنگ کی صدارت جہانگیر ترین خود کریں گے ۔ میٹنگ میں حکومت کی انتقامی کارروائیوں کے خلاف حکمت عملی طے ہوگی ۔ترین گروپ حکومت سے علیحدگی کے آپشن پر بھی غور کرے گا ۔

خیال رہے کہ  معاون خصوصی وزیراعلی ٰ پنجاب برائے سیاسی امور عون چوہدری نے استعفیٰ  دیدیا تھا، عون چوہدری جہانگیر ترین گروپ کے متحرک رہنما رہے ہیں ۔

اس حوالے سے عون چوہدری کاکہنا تھا کہ مجھے وزیراعلیٰ آفس سے  کہا گیا جہانگیر ترین کی حمایت چھوڑ دو یا استعفیٰ دو، جہانگیر ترین کی پارٹی کے لیے خدمات کو ہر کوئی جانتا ہے ۔ پارٹی کے لیے بے لوث خدمات سر انجام دینے والے شخص کو نہیں چھوڑ سکتا۔  عون چودھری  نے مزید کہا ہے کہ مشیر وزیراعلیٰ کے عہدے پر جہانگیر ترین کے ساتھ کھڑے ہونے کو ترجیح دوں گا۔