روزانہ نہاتی نہیں، شوہرنے بیوی کو طلاق دےدی

بھارتی میڈیا رپورٹس کے مطابق شمالی بھارت کی ریاست اتر پردیش کے علاقے علی گڑھ  میں طلاق کا ایک انوکھا معاملہ سامنے آیا ہے۔ جہاں ایک شوہر اپنی بیوی سے صرف اس وجہ سے ناراض ہو گیا کہ وہ روزانہ غسل نہیں کرتی۔  حال ہی میں خاتون کی جانب سے  علی گڑھ کے ویمن پروٹیکشن سیل میں تحریری شکایت درج کروائی گئی،  پروٹیکشن سیل  ازدواجی جوڑوں کو تعلقات بچانے  کے لیے کاؤنسلنگ سیشن فراہم کرتا ہے۔

بھارتی میڈیا سے گفتگو کرتے ہوئے پروٹیکشن  سیل کےعہدیدار کا کہنا تھا کہ ہمیں حال ہی میں خاتون کی جانب سے ایک تحریری شکایت موصول ہوئی ہے جس میں لکھا تھا کہ انھیں شوہر نے  روزانہ نہ نہانے کے باعث ایک ساتھ تین طلاقیں دے دی ہیں۔

میڈیا رپورٹس کے مطابق امان نامی شخص نے دو سال قبل خاتون سے شادی کی تھی جب کہ دونوں کا ایک بچہ بھی ہے۔ پروٹیکشن سیل خاتون کے رشتے کو بچانے کے لیے فریقین سمیت ان کے والدین سے مشاورت کررہا ہے تاہم خاتون  شوہر کی جانب سے طلاق کے باوجود اپنے رشتے کو خوشی سے نبھانے  کی خواہشمند ہے۔ خاتون کی درخواست پر جب ان کے شوہر سے رابطہ کیا گیا تو شوہرکا کہنا تھا کہ وہ اپنی بیوی کو طلاق دینا چاہتا ہے کیوں کہ وہ روزانہ نہیں نہاتی ہیں اور جب بھی ان سے نہانے کا کہا جائے تو وہ ان سے لڑنا شروع کردیتی ہے۔

پروٹیکشن سیل کے مطابق ،عہدیداوں کی جانب سے شوہر کو یہ سمجھانے کی کوشش کی جارہی ہے کہ یہ معمولی نوعیت کا مسئلہ ہے جو کہ بغیر طلاق دیے بھی حل کیاجاسکتا ہے تاہم اس کے باوجود اگر ان کی علیحدگی ہو گئی تو یہ عمل  بچے کی پرورش کو متاثر کرسکتا ہے۔