پاکستان کو افغان جنگ کے نتائج کا ذمہ دار قرار دینا درست نہیں:وزیراعظم

تفصیلات کے مطابق امریکی اخبار میں لکھے گئے مضمون میں وزیراعظم عمران خان نے کہا کہ درست اقدام یہ ہےکہ افغانستان میں امن کیلئے نئی افغان حکومت کے ساتھ تعاون کیا جائے، طالبان حکومت اوربین الاقوامی برادری کے درمیان روابط ہر ایک کیلئے مثبت مفادات لائے گی، اگرہم نے ماضی کی غلطیوں کو دہرایا تو بڑے پیمانے پر مہاجرین اور دہشتگردی جیسے مسائل بڑھیں گے۔

ان کا کہنا ہےکہ میں 2001 سے کہتا آرہا ہوں کہ افغانستان کو فتح کرنا ممکن نہیں ، ماضی میں حکومتوں نے افغان معاملے پر امریکا کی خوشنودی حاصل کرنے کی کوشش کی ، نائن الیون کے بعد مجاہدین راتوں رات دہشتگرد بن گئے۔

وزیراعظم نے کہا کہ نائن الیون کے بعد یکے بعد دیگرے آنے والی افغان حکومتیں افغانوں کی نظروں میں مقام پیدا نہ کرسکیں۔ یہی وجہ تھی کہ افغانستان میں کوئی بھی بدعنوان اور ناکام حکومت کے لئے لڑنے کو تیار نہ تھا۔

ان کا کہنا تھا کہ اس حقیقت کو تسلیم کرنے کے بجائے افغان اور مغربی حکومتیں پاکستان پر الزام لگانے کے لئے بھارت کے ساتھ مل کر جعلی خبریں چلاتی رہیں،بے بنیاد الزامات کے باوجود پاکستان نے سرحد کے بائیو میٹرک کنٹرول اور سرحد کی مشترکہ نگرانی کی پیشکش کی۔

انہوں نے کہا ہے کہ  ہم نے اپنے محدود وسائل کے باوجودافغانستان کے ساتھ سرحد پر باڑ لگائی،ہمیں اب الزام تراشی کا رویہ ترک کردینا چاہیے اور افغانستان کے مستقبل کی جانب دیکھنا چاہیئے۔

عمران خان کا کہنا تھا کہ درست اقدام یہ ہے کہ افغانستان میں امن و استحکام کے لئے نئی افغان حکومت کے ساتھ تعاون کیا جائے،طالبان کی حکومت اور بین الاقوامی برادری کی شمولیت ہر ایک کے لئے مثبت مفادات لائے گی، اگر ہم نے درست اقدام کیا تو ہم دہشتگردی سے پاک اور معاشی طور پر خوشحال افغانستان کے مقاصد حاصل کر لیں گے۔

ان کا مزید کہا تھا کہ اگر ہم نے ماضی کی غلطیوں کو دہرایا تو بڑے پیمانے پر مہاجرین اور دہشتگردی جیسے مسائل بڑھیں گے اور تمام فریق متاثر ہوں گے۔