وزیراعلیٰ پنجاب  عثمان بزدار کی زیر صدارت اعلیٰ سطح کا جائزہ اجلاس 

تفصیلات کے مطابق وزیراعلیٰ عثمان بزدار نےصوبے میں 15نئی یونیورسٹیوں کے قیام پر پیشرفت کاجائزہ لیا اور کہا کہ ہر ضلع میں یونیورسٹی کے قیام سے طلبہ بالخصوص طالبات کو اعلیٰ تعلیم کے مواقع میسر ہوں گے۔

ان کا کہنا تھا کہ تعلیمی بورڈ کے کنٹرولر اورسیکرٹریز کامیرٹ پر تقرر یقینی بنایا جائے،راجن پورمیں انڈس یونیورسٹی بننے سے عوام کا دیرینہ مطالبہ پورا ہوگا۔

انہوں نے کہا ہے کہ یونیورسٹی آف مظفر گڑھ،لیہ،بھکر،حافظ آباداوربہاولنگرکا قیام بھی عمل میں لایاجائے گا، شیخوپورہ، قصور،اٹک، گوجرانوالہ اوردیگر اضلاع میں بھی یونیورسٹیاں بنائیں گے۔

وزیراعلیٰ پنجاب  عثمان بزدار کا مزید کہنا تھا کہ ڈیرہ غازی خان میں یونیورسٹی آف تونسہ اورویمن یونیورسٹی بننے سے محرومیوں کاازالہ ہوگا۔

اجلاس میں پنجاب میں نئی یونیورسٹیوں کے قیام پر پبلک پرائیویٹ پارٹنر شپ اور جوائنٹ ونچر موڑ پر غور کیا گیا جبکہ صوبے میں سمارٹ یونیورسٹی کا کونسپٹ متعار ف کرانے کا فیصلہ کیا گیا ہے۔

اجلاس میں صوبہ بھر میں کالج ٹیچر انٹرن(CTI) کی مزید بھرتیوں کی اصولی منظوری دی گئی ہے جبکہ وزیراعلیٰ نےکالج پرنسپل کی خالی آسامیاں جلد  پرکرنے کے لئے کارروائی مکمل کرنے کی ہدایت بھی کی ہے۔ 

اجلاس کے شرکاء کو بریفنگ دیتے ہوئے متعلقہ حکام نے کہا کہ ہائرایجوکیشن کے197ترقیاتی منصوبے 15ارب روپے کی لاگت سے مکمل کئے جائیں گے،88نئے کالجز کے قیام کے لئے21کالجز کی اراضی کے انتقال کا عمل مکمل ہوچکا ہے۔