وفاقی کابینہ کی نیب آرڈیننس میں ترامیم کی منظوری

ذرائع کے مطابق وفاقی کابینہ نے سرکولیشن سمری کے ذریعے نیب آرڈیننس میں ترامیم کی منظوری دی ہے۔وفاقی کابینہ سے منظوری کے بعد نیب آرڈیننس کا مسودہ آج شام تک صدرِ مملکت ڈاکٹر عارف علوی کو بھجوائے جانے کا امکان ہے۔ ذرائع نے بتایا ہے کہ صدرِ مملکت ڈاکٹر عارف علوی کی جانب سے آج ہی آرڈیننس جاری کیے  جانے کا امکان ہے۔

چیئرمین نیب کے معاملہ پر وزیراعظم کا دو ٹوک موقف، وزیر قانون اور اٹارنی جنرل کو واضح بتا دیا۔ وزیراعظم عمران خان کا کہنا ہے کہ چیئرمین نیب کی تقرری کے لیے اپوزیشن لیڈر سے کوئی  مشاورت نہیں کروں گا۔

نیب ترمیمی آرڈیننس 2021ء کا مسودہ

واضح رہے کہ نیب ترمیمی آرڈیننس 2021ء کا مسودہ تیار کر لیا گیا ہے۔ قومی احتساب بیورو کے اختیارات میں کمی سمیت مجموعی طور پر نیب قانون کی 11 شقوں میں ترامیم ہوں گی۔ نیب ترمیمی آرڈیننس 2021 کے ذریعے ٹیکس کیسز، اجتماعی فیصلہ سازی، طریقہ کار کی غلطی نیب دائرہ اختیار سے نکل جائیں گے، وفاقی و صوبائی کابینہ، کمیٹیوں، کونسلز، کمیشنز اور بورڈ فیصلوں پر نیب اختیار ختم ہوگا، اچھی نیت سے سرکاری امور نمٹانے، براہ راست مالی فائدہ نہ لینے کے کیسز بھی نیب اختیار سے خارج ہوں گے۔

مجوزہ آرڈیننس کے ذریعے احتساب عدالت کے ججوں کو ہائیکورٹ کے جج کی مراعات ملیں گی، جب کہ جج احتساب عدالت کو ہٹانے کے لئے صدر و چیف جسٹس کی مشاورت لازمی قرار دینے کی تجویز بھی آرڈیننس کے مسودے میں شامل ہے۔