چیئرمین نیب کی تعیناتی صدر  پاکستان کریں گے: وفاقی وزیرقانون

تفصیلات کے مطابق وفاقی وزیرقانون فروغ نسیم کا وفاقی وزیراطلاعات کے ساتھ میڈیا سے گفتگوکرتے ہوئے کہنا تھا کہ صدر مملکت وزیراعظم اور اپوزیشن لیڈر سے مشاورت کے بعد چیئرمین نیب تعینات کرینگے۔

وفاقی وزیرقانون فروغ نسیم کا کہنا تھا کہ نئے چیئرمین نیب کی تقرری تک موجودہ چیئرمین کام کرتے رہیں گے۔

ان کا کہنا تھا کہ اگر اتفاق رائے نہیں ہوتا تو چیئرمین نیب کے تقرر کے لیے پارلیمانی کمیٹی بنےگی، پارلیمانی کمیٹی اسپیکر قومی اسمبلی قائم کریں گے، پارلیمانی کمیٹی 6 اپوزیشن اور 6 حکومتی ارکان پر مشتمل ہو گی۔

انہوں نے کہا ہے کہ نیب قانون کے معاملے پر اپوزیشن نے ہمارے ساتھ بڑی سیاست کی ،بدقسمتی سے بیوروکریسی کے معاملے پر اپوزیشن آڑے آگئی اور نیب کی ترامیم میں اپنی 34 ترامیم لے آئی۔

وزیرقانون کا کہنا تھا کہ چیئرمین نیب کی تقرری کے لیے وزیر اعظم کے ساتھ کئی اجلاس ہوئے، چیئرمین نیب کےلیے لفظ نان ایکسٹینڈایبل کو تبدیل کیا ہے،فیصلہ ہوا ہے کہ ایسی ترامیم لائی جائیں کہ سب ٹیکس ایشو ایف بی آر دیکھے، پرائیویٹ شخص کو نیب کے دائرہ اختیار سے نکال دیا گیا ہے۔

وزیر اطلاعات فواد چوہدری کا کہنا تھا کہ چیئرمین نیب کی تقرری کے لیے  وزیراعظم عمران خان شہباز شریف سے مشاورت نہیں کریں گے، وزیراعظم سےمشاورت کے لیے اپوزیشن کوئی اور اپوزیشن لیڈر لے آئے۔

ان کا کہنا تھا کہ  بے ہودہ بات ہے کہ چور سے پوچھ کر تقرری کریں، چوروں سے پوچھ کر تھانیدار نہیں لگا سکتے، شہبازشریف میں تھوڑی بہت شرم ہو تو خود ہی اپوزیشن لیڈر سے مستعفی ہوجائیں۔

ان کا مزید کہنا تھا کہ آرڈیننس کے ساتھ نیب قانون میں ترمیم ایکٹ کے ذریعے بھی کررہے ہیں،اپوزیشن سے بھی اس متعلق تجاویز مانگیں گے،نیب گندے کام میں پڑنے کے بجائے اہم اور اصل کام کرے گا۔