بلوچستان میں 5.9 شدت کا زلزلہ ، 24 افراد جاں بحق ، 300سے زائد زخمی 

تفصیلات کے مطابق بلوچستان کے ضلع ہرنائی میں زلزلہ بدھ اور جمعرات کی درمیانی شب 3 بجکر 2 منٹ پر آیا۔  زلزلہ پیما مرکز کے مطابق زلزلے کی شدت 5.9 اور گہرائی 15 کلومیٹر تھی جبکہ اس کا مرکز ہرنائی تھا ، مختلف علاقوں میں آفٹر شاکس کا سلسلہ بھی کئی گھنٹوں تک جاری رہا ۔زلزلے کے جھٹکے پشین، ہرنائی، سبی، زیارت، قلعہ سیف اللہ، لورالائی اور مسلم باغ سمیت صوبے بھر میں محسوس کیے گئے۔ ہرنائی اور شاہرگ میں 70 سے زائد مکانات کو بھی نقصان پہنچا ہے جبکہ درجنوں  افراد ملبے تلے دب کر زخمی ہوئے ہیں جبکہ ہلاکتوں میں  بھی اضافے کا خدشہ ہے ۔

ہلاکتوں میں زیادہ تعداد بچوں کی ہے ،  تاحال  امدادی کارروائیاں جاری ہیں۔ کوئٹہ، ۔ہرنائی اور اس کے گرد و نواح میں نقصانات کی اطلاع کے پیش نظر ہسپتال  میں ڈاکٹرز اور عملہ ہنگامی بنیادوں پر طلب کر لیا گیا ہے ۔

 پی ڈی ایم اے کے مطابق زلزلے کے باعث متاثرہ علاقوں میں بجلی کی سپلائی معطل ہو گئی۔ وزیر داخلہ بلوچستان ضیالانگو کے مطابق شدید زخمیوں کو کوئٹہ منتقل کر دیا گیا۔ زلزلے کے بعد ایف سی، لیویز اور پولیس بھی امدادی کارروائیوں میں شریک ہیں۔

دوسری جانب وزیراعلیٰ بلوچستان جام کمال خان  نے  سماجی رابطے کی ویب سائٹ ٹوئٹر پر بتایا ہے کہ ہرنائی میں تمام امدادی کارروائیاں اور انخلا کا عمل جاری ہے۔  ان کا کہنا تھا کہ میڈیکل، مقامی انتظامیہ اور ڈیزاسٹر منیجمنٹ ٹیموں کو ہائی الرٹ اور موبلائز کردیا گیا ہے۔ ان کا کہنا تھا کہ میڈیکل، مقامی انتظامیہ اور ڈیزاسٹر منیجمنٹ ٹیموں کو ہائی الرٹ اور موبلائز کردیا گیا ہے۔ان کا مزید کہنا تھا کہ خون ، ہنگامی امداد، ہیلی کاپٹر اور دیگر تمام اشیا کا بندو بست کرلیا گیا ہے اور تمام محکمے اس سلسلے میں کام کررہے ہیں۔

Blood, Ambulances, emergency assistance, Heli and rest all things are placed.... All departments are Woking on it

— Jam Kamal Khan (@jam_kamal) October 7, 2021

یاد رہے کہ  نومبر2020  میں بھی کوئٹہ اور اس کے گرد و نواح کے علاقوں میں 5.1 شدت کا زلزلہ محسوس کیا گیا تھا جس کے باعث عوام میں خوف و ہراس پھیل گیا تھا۔

اس سے قبل سال 2017 میں بلوچستان کے ساحلی علاقوں گوادر، پسنی مکران میں 6.3 شدت کا زلزلہ آیا تھا جس کے نتیجے میں کسی جانی نقصان کی اطلاع نہیں ملی تھی۔