قومی سلامتی کمیٹی اجلاس:  افغانستان میں سنگین انسانی صورتحال پر تشویش کا اظہار

تفصیلات کے مطابق  وزیراعظم عمران خان کی زیرصدارت قومی سلامتی کمیٹی اجلاس کا اعلامیہ جاری کردیا گیا ہے۔

اعلامیہ میں کہا گیا ہے کہ  اجلاس میں افغانستان کی موجودہ صورتحال پر تبادلہ خیال کیا گیا، اجلاس میں سروسز چیفس، انٹیلی جنس چیفس اور کابینہ ارکان شریک ہوئے تھے۔

 اعلامیہ کے مطابق   اجلاس میں علاقائی سلامتی، افغانستان کی صورتحال اور پاکستان پر ممکنہ اثرات پر بریفنگ دی گئی، کمیٹی نے  پرامن، مستحکم خودمختار افغانستان کے عزم کا اعادہ کیا،کمیٹی نے افغانستان میں سنگین انسانی صورتحال پر تشویش کا اظہار کیا۔

شرکاء نے بین الاقوامی برادری پر زور دیا کہ وہ افغانستان میں انسانی بحران سے بچنے کے لیے مدد فراہم کرے، اجلاس میں افغانستان میں عبوری حکومت کے ساتھ تعمیری سیاسی اورمعاشی ضروریات پربین الاقوامی رابطہ کی اہمیت کوبھی اجاگر کیا گیا۔