مینار پاکستان کیس میں بڑی پیش رفت، عائشہ اکرم نے بھی اہم قدم اٹھا لیا

لاہور :صوبائی دارالحکومت لاہور میں واقع مینار پاکستان پر دست درازی کا شکار ہونے والی عائشہ اکرم نے ایک اور نیا قدم اٹھا لیا۔عائشہ اکرم نے ملازمت سے تین ماہ کی چھٹیاں لے لیں۔عائشہ ٹک ٹاکر ہونے کے ساتھ پنجاب انسٹی ٹیوٹ آف کارڈیالوجی میں بحثیت نرس بھی اپنی پیشہ ورانہ خدمات انجام دیتی ہیں، وہ اسپتال سے تین ماہ کی چھٹیوں پر چلی گئی ہیں۔

میڈیا رپورٹس کے مطابق اسپتال کی میڈیکل سپرنٹنڈنٹ کا کہنا ہے کہ نرس نے اسپتال سے تین ماہ کی چھٹی حاصل کی۔ٹک ٹاکر نے پہلے 10 روز کی چھٹی لی تھی بعدازاں انہوں نے مزید80 دن کی چھٹیاں لے لیں۔عائشہ کی جانب سے ممکنہ طور پر کیس وجہ سے طویل چھٹیاں لی گئی ہیں۔خیال رہے کہ مینار پاکستان مین خاتون ٹک ٹاکر کو ہراساں کرنے کے کیس میں آئے روز اہم انکشافات سامنے آ رہے ہیں اور حالیہ پیش رفت کے بعد لوگ بھی دو حصوں میں تقسیم ہوتے نظر آ رہے ہیں۔

آج گریٹر اقبال پارک دست درازی کیس میں اہم ہیش رفت سامنے آئی تھی جب بتایا گیا کہ ٹک ٹاکر عائشہ اکرم کے گرد بھی گھیرا تنگ ہونے لگا ہے۔ پولیس کے مطابق عائشہ اکرم نے مرضی سے قابل اعتراض ویڈیوز بنوائیں۔ قابل اعتراض ویڈیو بنانے پر عائشہ کے خلاف کارروائی کا فیصلہ کیا گیا ہے۔پیکا ایکٹ کے تحت کارروائی کرنے کی لیگل ڈیپارٹمنٹ سے رائے طلب کر لی گئی ہے۔

پولیس کے مطابق مرضی سے ویڈیوز بنوانا اور سوشل میڈیا پر وائرل کرنا جرم ہے۔ٹک ٹاکر عائشہ اکرم اور ریمبو کی نازیبا ویڈیوز وائرل ہوئی تھیں۔ ذرائع کے مطابق چونکہ اپنی مرضی سے اخلاق سوز ویڈیوز بنوانا اور سوشل میڈیا پر وائرل کرنا جرم ہے لہذا پیکا ایکٹ کے تحت ریمبو اور عائشہ کو 7 سال قید کی سزا ہو سکتی ہے۔یاد رہے کہ اس سے پہلے بھی مینار پاکستان پر دست درازی کیس میں عائشہ اکرم اور ریمبو کی مبینہ آڈیو ٹیپ سامنے آئی تھی۔

آڈیو ٹیپ میں عائشہ اکرم اور ریمبو کے مابین مکالمہ ہوا اور پوچھا گیا کہ مجرم چھ ہیں یا سات ۔ جس پر عائشہ اکرم نے ریمبو کو بتایا کہ مھرم چھ ہیں جنہیں شناخت کیا ہے۔ عائشہ اکرم اور ریمبو کے مابین مکالمے میں منصوبہ بندی کی گئی کہ فی مجرم کتنے پیسے لیے جائیں ، زیادہ تر مجرم غریب ہیں۔ لیک ہونے والی مبینہ آڈیو ٹیپ میں عائشہ اکرم نے کہا کہ مشکل سے ان لوگوں نے پانچ پانچ لاکھ کرنے ہیں۔ پولیس کا کہنا ہے کہ کیس میں گرفتار ملزمان سے عائشہ اکرم اور ریمبو نے رہائی کے بدلے رقم لینے کی منصوبہ بندی کی تھی۔