جانسن اینڈجانسن کی " سنگل شاٹ " کورونا ویکسین محفوظ اورموثر قرار

تفصیلات کے مطابق یو ایس فوڈ اینڈ ڈرگ ایڈمنسٹریشن (ایف ڈی اے) نے ایک دستاویز میں  ویکسین کے ہنگامی استعمال کی منظوری جلد دیئے جانے کا امکان ظاہر کیا ہے ۔ایف ڈی اے  26 فروری کو ویکسین کو استعمال کرنے کی منظوری کا فیصلہ کرے گا۔ جانسن اینڈ جانسن نے جنوری کے آخر میں ویکسین کے تیسرے مرحلے کے ٹرائل کے نتائج جاری کیے تھے، جس کے مطابق    یہ  ویکسین معتدل اور شدید بیماری کو روکنے  میں 66 فیصد تک مؤثر ثابت ہوئی۔  تاہم کمپنی کا کہنا تھا کہ شدید بیماری کے خلاف اس کی افادیت 85 فیصد تھی۔ امریکا میں یہ ویکسین معتدل اور شدید بیماری کے خلاف 72 فیصد، لاطینی امریکا میں 66 فیصد اور جنوبی افریقہ میں 57 فیصد مؤثر رہی۔کمپنی نے ایف ڈی اے کو ڈیٹا جمع کراتے ہوئے کہا تھا کہ یہ ویکسین بغیر علامات والے کیسز کی روک تھام کے لیے بھی مؤثر ہے۔

جانسن اور جانسن کی ویکسین فائزر اور موڈرنہ کی ویکسینز کا  مؤثر متبادل ہے ، اور اس  کو ڈیپ  فریزر کی بجائے فریج  میں محفوظ کرنے کا آپشن بھی موجود ہے۔ ایف ڈی اے کے مطابق یہ ویکسین بیماری میں مبتلا ہونے کا خطرہ ویکسی نیشن کے  دوہفتوں بعد نمایاں حد تک کم کردیتی ہے۔

اس سے قبل جانسن اینڈ جانسن نے  ویکسین کی افادیت کی شرح کے علاوہ   کلینیکل ٹرائل کی تفصیلات جاری نہیں کی تھیں۔مستقبل میں ویکسین کی منظوری مل سکتی ہے مگر اس سے پہلے ہی اس کی کافی زیادہ پروڈکشن کو مختلف ممالک اپنے لیے مختص کراچکے ہیں۔  کمپنی کا کہنا ہے کہ وہ مارچ کے آخر تک مجموعی طور پر 20 ملین خوراکیں فراہم کرنے کا ارادہ رکھتا ہے ، امریکا نے اس کی 10 کروڑ  ، برطانوی حکومت نے 3 کروڑ جبکہ یورپی یونین نے 200 ملین  اور کینیڈا نے  38 ملین  خوراکوں  کا آرڈر دیا ہے ۔