وزیراعظم کا سمندرپار پاکستانیوں کیلئے خصوصی اقدام 

تفصیلات کے مطابق  وزیراعظم ڈلیوری یونٹ (پی ایم ڈی یو) کی طرف سے جاری بیان کے مطابق حکومت نے سمندر پار پاکستانیوں کو سہولیات فراہم کرنے کے لیے ایک اور بڑا اقدام کیا ہے ۔

وزیر اعظم عمران خان  نے وفاقی اداروں میں سہولت کار افسران مقرر کرنے کا حکم دیاہے۔ وزیراعظم  عمران خان نے ہدایت کی ہے کہ 39وفاقی ڈویژنز میں اوورسیز پاکستانیوں کیلئے سہولت کار افسر مقرر کیے جائیں جبکہ  وزیراعظم نے13 وزارتوں کے 34 ذیلی اداروں میں خصوصی سیکشن اور ڈیسک قائم کرنے کا بھی حکم دیا ہے۔ 

وزیراعظم کی ہدایت پر وزیراعظم ڈلیوری یونٹ نے متعلقہ وزارتوں کو اس سلسلے میں ہدایات جاری کر دی ہیں۔ وزیراعظم آفس کی طرف سے جاری بیان میں کہا گیا کہ سہولت کار افسران گریڈ 19سے کم کے نہیں ہوں گے اور وزارتیں سہولت کار افسران کی تعیناتی کو نوٹیفائی کر یں گی ۔

علاوہ ازیں مراسلے میں ہدایت کی گئی ہے کہ مخصوص سیکشن اور ڈیسک کے قیام کا بھی باقاعدہ نوٹیفیکشن جاری کیاجائے اور وفاقی ادارے سہولت کی فراہمی سے متعلق آگاہی کے لیے وزارت خارجہ، وزارت سمندر پار پاکستانیز اوراطلاعات کو معلومات فراہم کریں، اس اقدام کا مقصد سمندر پار پاکستانیوں کو دفاتر میں درپیش مسائل کا ازالہ کرنا ہے۔

وزیراعظم آفس نے ہدایت کی کہ تمام ڈویژنز 21 روز میں کارروائی مکمل کر کےرپورٹ دیں،اس اقدام سے سمندر پار پاکستانیوں کے لئے خدمات کی فراہمی اور دیگرامور سے متعلق آگاہی میں معاونت میسر ہو گی ۔ وزارت خارجہ، اوورسیز پاکستانی اوراطلاعات و نشریات اپنے طور پر بھی سہولت کی آگاہی دیں گی۔