سونا لوگوں کی پہنچ سے دور،فی تولہ مزید 21 ہزارروپے مہنگا، نئی قیمت کیاہو گئی؟

کراچی: سونے کی مقامی اور عالمی قیمتوں میں ایک بار پھر بڑا اضافہ ہوگیا ہے، جس کے بعد سونا تاریخ کی نئی بلند ترین سطح پر پہنچ گیا ہے۔

آل پاکستان جیمز اینڈ جیولرز ایسوسی ایشن کے مطابق کاروباری ہفتے کے چوتھے روزفی تولہ سونے کی قیمت میں 21 ہزار 200 روپے کا نمایاں اضافہ ہوا، جس کے بعد فی تولہ سونا 5 لاکھ 72 ہزار 862 روپے کی ریکارڈ سطح پر جا پہنچا ہے۔

ایسوسی ایشن کے مطابق اسی طرح  10 گرام سونا 18 ہزار 175 روپے مہنگا ہو گیا، جس کے بعد 10 گرام سونے کی قیمت پہلی بار 4 لاکھ 91 ہزار 136 روپے کی سطح پر پہنچ گئی۔

دوسری جانب عالمی مارکیٹ میں بھی سونے کی قیمتوں میں تیزی برقرار ہے،عالمی سطح پر سونے کی قیمت 212 ڈالر اضافے کے ساتھ 5 ہزار 505 ڈالر فی اونس ہو گئی ہے۔

اس حوالے سےصرافہ ذرائع کا کہنا ہے کہ ملکی تاریخ میں پہلی مرتبہ سونے کی قیمتیں اس قدر بلند سطح پر پہنچی ہیں، جس کے باعث زیورات کی خرید و فروخت میں نمایاں کمی دیکھنے میں آ رہی ہے جبکہ سرمایہ کاروں کی دلچسپی میں اضافہ ہوا ہے۔

واضح رہے کہ گزشتہ روز سونے کی قیمت میں 21 ہزار 100 کا اضافہ ہوا تھا،جبکہ جنوری 2026 میں سونے کا بھاؤ 115900 روپے بڑھ چکا ہے۔