فیلڈ مارشل سیدعاصم منیر سے ترک چیف آف جنرل اسٹاف کی ملاقات، علاقائی سلامتی ،دفاعی تعاون پر تبادلہ خیال

راولپنڈی:چیف آف آرمی اسٹاف و چیف آف ڈیفنس اسٹاف فیلڈ مارشل سید عاصم منیرسےچیف آف ترکش جنرل اسٹاف جنرل سیلچُک بایراکتاراوغلو نے آج جنرل ہیڈکوارٹرز (جی ایچ کیو) میں ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق جی ایچ کیو آمد پر پاک فوج کے چاق و چوبند دستے نے معزز مہمان کو گارڈ آف آنر پیش کیا۔ملاقات کے دوران باہمی دلچسپی کے امور، خطے اور دنیا کی موجودہ سیکیورٹی صورتحال کے ساتھ ساتھ دوطرفہ دفاعی اور عسکری تعاون کو مزید مضبوط بنانے کے امکانات پر تفصیلی تبادلۂ خیال کیا گیا۔

ترجمان پاک فوج کے مطابق دونوں معزز شخصیات نے پاکستان اور ترکیہ کے مابین تعلقات کی موجودہ مثبت سمت پر اطمینان کا اظہار کیا اور قریبی رابطے برقرار رکھنے اور دفاعی تعاون کو فروغ دینے کی ضرورت پر زور دیا۔

ترجمان نے مزید بتایا کہ اس موقع پر فیلڈ مارشل سید عاصم منیر نے پاکستان اور ترکیہ کے درمیان دیرینہ برادرانہ تعلقات کو اجاگر کرتے ہوئے کہا کہ یہ رشتہ مشترکہ تاریخ، باہمی اعتماد اور عوامی سطح پر مضبوط روابط پر مبنی ہے۔ انہوں نے ترک مسلح افواج کی جانب سے تعاون اور حمایت کو سراہا اور دوطرفہ عسکری تعلقات کو مزید وسعت دینے کے عزم کا اعادہ کیا۔

جنرل سیلچُک بایراکتاراوغلو نے پرتپاک استقبال پر شکریہ ادا کیا اور پاکستانی مسلح افواج کی پیشہ ورانہ صلاحیتوں کی تعریف کی۔ انہوں نے تربیت، مشترکہ مشقوں اور استعداد کار میں اضافے کے اقدامات سمیت دفاعی تعاون کو مزید گہرا کرنے کے ترک عزم کا اعادہ کیا۔

ترجمان پاک فوج کا مزید کہنا ہے کہ یہ دورہ پاکستان اور ترکی کے مابین مضبوط اسٹریٹجک شراکت داری اور خطے میں امن، استحکام اور سلامتی کے لیے مشترکہ عزم کا عکاس ہے۔