ہمارا جذبہ بھی فوج جیسا ہی ہوتا ہے ، ہر وقت جان دینے کے لیے تیار ، محمد رضوان 

محمد رضوان  نے  بنگلہ دیش روانگی سے قبل میڈیا سے گفتگو  کرتے ہوئے کہا کہ   طبیعت پہلے سے بہتر ہے ، سب سے دعاؤں کی اپیل ہے،  ہمارا جذبہ بھی فوج جیسا ہی ہوتا ہے ، ہر وقت جان دینے کے لیے تیار ہوتے ہیں،   میں پاکستان کے لیے ہر وقت تیار رہتا ہوں۔

قومی کرکٹ ٹیم ہوٹل سے بنگلہ دیش کے لیے روانہ ہوگئی، بابراعظم اور شعیب ملک چند روز بعد ٹیم کو ڈھاکہ میں جوائن کریں گے ،  قومی کرکٹ ٹیم بنگلہ دیش میں ایک روزہ آئیسولیشن کرے گی ،   قومی کھلاڑیوں کی فیملیز بنگلہ دیش سفر نہیں کر رہیں ۔

واضح رہے کہ  پاکستان اور بنگلہ دیش کے مابین تین ٹی ٹونٹی اور دو ٹیسٹ میچوں کی سیریز شیڈول ہے۔

یاد رہے کہ ورلڈ ٹی ٹوئنٹی کے سیمی فائنل میں محمد رضوان نے شاندار اننگ کھیلتے ہوئے 52 گیندوں پر 67 رنز بنائے، انہوں نے اپنی اننگ میں4 چھکے اور تین چوکے لگائے۔ سیمی فائنل سے قبل محمد رضوان کو فلو اور بخار کی شکایات تھیں تاہم قومی ٹیم کے میڈیکل پینل نے میچ سے چند گھنٹے قبل انہیں کھیل کے لیے فٹ قرار دیا تھا۔ قومی ٹیم کے وکٹ کیپر بلے باز محمد رضوان کی آئی سی یو میں موجودگی کی تصویر سامنے آئی تھی۔