میں کوئی نجومی نہیں کہ نتائج بتا سکوں : شہباز شریف

تفصیلات کے مطابق مسلم لیگ ن کے صدر شہباز شریف کو سینیٹ انتخابات کیلئے کوٹ لکھپت جیل سے اسلام آباد میں پارلیمنٹ ہاؤس پہنچا دیا گیا، شہبازشریف سینیٹ انتخابات میں ووٹ ڈالنے کیلئے پارلیمنٹ ہاؤس میں اپوزیشن چیمبر میں پہنچے ۔ 

اس دوران میڈیا سے گفتگو میں شہباز شریف نے کہا کہ آج ہر ممبر نے اپنے ضمیر کے مطابق ووٹ ڈالنا ہے ، الیکشن کمیشن شفافیت کو یقینی بنائے ۔ سینیٹ الیکشن کے نتائج سے متعلق سوال کے جواب میں شہبازشریف کا کہناتھا کہ میں کوئی نجومی یا ولی نہیں نہیں ہوں کہ بتاسکوں کہ کون جیتے گا ۔

دوسری جانب مسلم لیگ ن کے دیگر رہنماپی ڈی ایم کے مشترکہ امیدوار یوسف رضا گیلانی کی جیت کےلیے پرامید ہیں۔ شاہد خاقان عباسی کا کہنا ہے کہ ووٹ خراب کرنے کا نہیں  ووٹ ڈالنے کا طریقہ ہوتا ہے۔ یوسف رضا گیلانی  کی کامیابی کا 110 فیصد یقین ہے۔

مسلم لیگ ن کے رہنما  احسن اقبال کو بھی یوسف رضا گیلانی کی کامیابی کی توقع ہے۔ انہوں نے حکمران جماعت  کا  انتشار کا  شکار قرار دیا ہے۔خواجہ سعد رفیق کا کہنا تھا کہ پی ٹی آئی ارکان شدید دباؤ میں ہیں۔آج بڑابریک تھرو ہو سکتا ہے ۔ خواجہ سعد رفیق نے فواد چودھری پر تنقید کرتے ہوئے کہا کہ وہ جو مرضی کہتے رہیں۔

واضح رہے کہ سینیٹ کی 37 نشستوں کے لیے ووٹنگ کا عمل جاری ہے، اراکین اپنی حق رائے دہی استعمال کرنے کے لیے ایوان میں آرہے اور ووٹ کاسٹ کر رہے ہیں، پولنگ بغیر کسی وقفے کے شام 5 بجے تک جاری رہے گی۔ قومی اور صوبائی اسمبلیوں کے باہر سکیورٹی کے سخت انتظامات کئے گئے ہیں۔ اسلام آباد کی جنرل نشست پر پی ٹی آئی کے ڈاکٹر عبدالحفیظ شیخ اور پاکستان ڈیموکریٹک موومنٹ کے یوسف رضا گیلانی کے درمیان کانٹے کا مقابلہ متوقع ہے۔