ماضی میں جس گھر پر پی پی پی کا پرچم لہرایا،اس پرچم کو دوبارہ اس گھر پر لہرائیں گے:بلاول بھٹو

تفصیلات کے مطابق بلاول بھٹو کا پاکستان پیپلز پارٹی میں شمولیت اختیار کرنے والے مختلف سیاسی جماعتوں کے 180 سے زائد افراد کو مبارک باد دیتے ہوئے کہنا تھا کہ ماضی میں جس نے کبھی بھی جئے بھٹو کا نعرہ لگایا، اس کو اپنے ساتھ ملائیں گے۔

بلاول بھٹو کا کہنا تھا کہ آج بھی روٹی، کپڑا اور مکان کا نعرہ اتنا ہی معنی رکھتا ہے کہ جتنا 70 کی دہائی میں اہم تھا، پاکستان پیپلزپارٹی کی بنیاد لاہور میں رکھی گئی، پنجاب کے اس دل شہرِ لاہور کو ہم نے جیتنا ہے۔

چیئرمین پاکستان پیپلز پارٹی کا کہنا تھا کہ پاکستان پیپلزپارٹی نے ماضی میں پنجاب کے عوام کو روزگار دیا، رہائشی اسکیموں کے ذریعے گھر دئیے، وہ پاکستان پیپلزپارٹی ہی ہے کہ جو پنجاب کے عوام کو روزگار دے سکتی ہے۔

دورانِ ملاقات ان کا کہنا تھا کہ ہماری کسی سے ذاتی لڑائی نہیں، ہمارا مسئلہ عوام کے بنیادی حقوق ہیں، پاکستان پیپلز پارٹی حکومت کرنے کے لئے نہیں بلکہ عوامی خدمت کے لئے سیاست کرتی ہے۔

بلاول بھٹو کا کہنا تھا کہ جب میں پنجاب کی ہر تحصیل میں پہنچوں گا تو سیاسی حریفوں کو پتہ لگ جائے گا کہ سیاست تو پاکستان پیپلزپارٹی کرتی ہے۔

چیئرمین بلاول بھٹو زرداری کے ہمراہ راجہ پرویز اشرف، حسن مرتضی، شہزاد سعید چیمہ، اسلم گِل و دیگر موجود تھے۔