عطا تارڑ سمیت کئی لیگی رہنماؤں کیخلاف مقدمہ درج

تفصیلات کے مطابق پولیس کو واقعے سے متعلق  جمع کرائی گئی ایف آئی آر میں کہا گیا ہے کہ لیگی رہنما عطا تارڑ، چودھری وحید، عبدالغفار ڈوگر، سعد و دیگر ملزمان نے دروازہ توڑ کر اسلحے سمیت گھر پر دھاوا بولا، چادر چار دیواری کا تقدس پامال کرتے ہوئے نعرے بازی کی۔ 

ن لیگ کے حملہ آوروں نے خواتین کو بالوں سے پکڑ کا گھسیٹا، پاکستان پیپلزپارٹی مردہ باد کے نعرے لگائے اور جیالوں کو الیکشن آفس بند نہ کرنے کی صورت میں گولیاں مارنے کی دھمکیاں دیں۔

ایف آئی آر میں درخواست کی گئی ہےکہ پولیس حملے میں ملوث ملزمان کو پکڑ کر قرار واقعی سزا دے۔ مقدمہ پیپلز پارٹی امیدوار سید میر واثق کی مدعیت میں درج کیا گیا ہے۔

یاد رہے کہ گزشتہ روز حلقہ پی پی 206 خانیوال میں پیپلز پارٹی کے امیدوار میر واثق کی رہائش گاہ پر خواتین کا رش دیکھ کر مسلم لیگ ن کے رہنما عطا تارڑ کئی کارکنوں کے ہمراہ وہاں پہنچ گئے تھے۔

اس دوران ن لیگ اور پیپلز پارٹی کے کارکنوں میں ہاتھا پائی شروع ہونے والی تھی کہ پولیس نے دونوں جماعتوں کے کارکنوں کو روک لیاجس پر ن لیگ کے کارکنوں نے الزام عائد کیا کہ پی پی امیدوار غریب خواتین کو اپنی رہائش گاہ پر بلا کر فی کس2 ہزار روپے بانٹ کر ووٹ خرید رہے ہیں۔

دوسری جانب پی پی امیدوار میر واثق  نے پولیس کو بتایا کہ گھرپرکارنر میٹنگ چل رہی تھی کہ لیگی رہنما اور کارکنوں نے حملہ کردیا۔

میر واثق  کے مطابق لوگوں کی بڑی تعداد دیکھ کر ن لیگ بوکھلاہٹ کا شکار ہوگئی، بعد ازاں  پی پی امیدوار کی درخواست پر تھانہ سٹی میں لیگی رہنما عطا تارڑ سمیت 50 سے زائد کارکنوں کے خلاف مقدمہ درج کیا گیا۔