تیل کی قیمتیں بڑھ جائیں، آٹا عوام کی پہنچ سے دور ہو جائے، چینی لوگوں کو دستیاب نہ ہو،خوردنی تیل مہنگا ہو جائے، دوائیاں عوام کی استطاعت سے باہر ہو جائیں، بجلی کے نرخ بڑھ جائیں،گیس کا بل زیادہ ہو جائے دیگر اشیا  خورونوش کی قیمتیں آسمان کو چھو جائیں لیکن ان کے کان پر جوں تک نہیں رینگتی۔وگرنہ ماضی قریب میں 35سیٹوں کے ساتھ عمران خان نے حکومت کو نکیل ڈالی ہوئی تھی یہ اپوزیشن سینکڑوں کی تعداد میں ہو کر بھی اس کا عشر عشیر بھی نہیں ہے۔

یار لوگ بالکل ٹھیک کہتے ہیں کہ اگر نواز شریف دور میں چیزوں کی قیمتیں کنٹرول میں تھیں تو اس کی وجہ بھی عمران خان تھے اور اگر عمران خان کے دور میں بھی چیزوں کی قیمتیں آسمان سے باتیں کر رہی ہیں تو پھر بھی وجہ عمران خان ہی ہیں۔ پیٹرول کی قیمتیں بڑھتی ہیں تو پہلے عوام کو آسرا ہوتا تھا چلو اپوزیشن جماعتیں موجود ہیں متحرک ہوں گی لوگوں کو باہر نکالیں گی،شور شرابا کریں گی احتجاج ہو گا،مظاہرے ہوں گے اور حکومت خود ہی ڈر کر پیٹرول کی قیمتوں کو واپس لے لی گی لیکن موجودہ اپوزیشن کے دور میں تو لگتا ہے کہ حکومت کو ہی عوام پر کوئی رحم آ جائے تو آجائے ان تلوں میں تیل نہیں لگتا۔ وگرنہ لوگوں کو اچھی طرح یاد ہے کہ جب ماضی میں تیل کی قیمتیں پڑھتی تھیں تو اسمبلی کے فلور پر موجودہ حکومت کے وزیر اسد عمر لوگوں کو کاغذ لہرا لہرا کر یاد دلاتے تھے کہ جب جب تیل کی قیمتیں بڑھتی ہیں تو حکمرانوں کی جیبیں بھاری ہوتی ہیں اب پتہ نہیں کس کی جیبیں بھاری ہوتی ہیں۔

نواز دور میں تیل کی قیمتیں بڑھتی تھیں تو انہیں فواد چوہدری اورر شہباز گل جیسے وزیر بھی میسر نہ تھے جو عوام کو بتلاتے کہ پیٹرول کی قیمتیں محض تاریخ کی بلند ترین سطح پر پہنچی ہیں اور تیل ابھی بھی خطے میں پاکستان میں سب سے سستا مل رہا ہے اور نواز دور میں تو تیل کی قیمتیں بڑھنے پر وزرا مشیر منہ چھپاتے پھرتے تھے اور زیادہ سے زیادہ جو بہانہ انہیں سوجھتا تھا کہ عالمی منڈی میں تیل کی قیمتیں بڑھ رہی ہیں اس وجہ سے اضافہ کیا ہے اور اب اللہ کے فضل سے ایسے دانشور وزیر مشیر ہیں عالمی منڈی میں تیل کی قیمتیں نہ بھی بڑھیں اور ہمارے ہاں بڑھ جائیں تو وہ آپ کو اس کی ایسی توجیہ پیش کر یں گے عوام تیل کی بڑھتی قیمت کا دکھ بھول کر انہیں داد دینے پر مجبور ہو جاتی ہے کہ یہ نادرخیال ہمارے ذہن میں کیوں نہ آیا۔جلد ہی تیل کی طرح چینی، آٹا، چاول، دالوں، خوردنی تیل اور دیگر اشیا کی قیمتیں بڑھنے کی ایسی وجوہات پیش کر دی جائیں گی جنہیں پڑھ اور سن کر عوام جھولیاں اٹھا اٹھا کر حکمرانوں کو دعائیں دیں گے کہ شکر ہے مہنگی کی ہیں اس کے ساتھ اگر جرمانہ بھی رکھ دیتے تو انہیں کس نے پوچھنا تھا کیوں کہ اپوزیشن تو بے چاری آپس میں ”پاٹی“ ہوئی ہے انہوں نے ان معاملات پر کیا بولنا ہے۔ 

جیسے دوائیوں کی قیمتیں موجودہ حکومت کے دور میں تین سے چار بار بڑھا کر غریب میڈیکل کمپنیوں کو فائدہ پہنچایا گیا ہے۔یہ میں اپنے سے نہیں کہہ رہا وزیراعظم کے مشیر ڈاکٹر فیصل سلطان کہہ چکے ہیں پچھلے کوئی پندرہ سالوں سے دوائیوں کی قیمتوں میں اضافہ نہیں ہوا تھا تو اس لئے ہم نے آ کر قیمتیں بڑھائی ہیں تا کہ عوام کو یہ مہنگی ملیں لیکن ملتی رہیں۔ عوام بھی کیا کرے کیوں کہ جن کے پیچھے لگ کر انہوں نے اس سب کیخلاف احتجاج کرنا ہوتا ہے اور حکومت پر دباؤ بنانا ہوتا ہے انہیں اپنی پڑی ہوئی ہے کوئی مفاہت میں الجھا ہوا ہے تو کوئی مزاحمت کی راہ اپنا رہا ہے لیکن وہ بھی صرف سوشل میڈیا کی حد تک عملی طور پر عوام سے ہی کہا جا رہا ہے کہ آپ ہی باہر نکلیں ہم پر نہ رہیں۔ اور عوام کاحال ایسا ہے کہ کہتے ہیں گزرے زمانے میں ایک شخص کفن چوری کیا کرتا تھا، جب انتقال کا وقت قریب آیا تو اس نے اپنے بیٹے کو بلایا اور وصیت کی اور کہا بیٹا! دیکھ تیرے باپ نے ساری زندگی لوگوں کے کفن چوری کیے ہیں، میرے دنیا سے چلے جانے کے بعد کوئی کام ضرور ایسا کرنا کہ لوگ تیرے باپ کو اچھے الفاظ میں یاد کریں۔ بیٹے نے باپ کی وصیت کو پلے باندھ لیا۔ باپ کے انتقال کے بعد بیٹے نے بھی کفن چوری کرنا شروع کر دیے لیکن اس کے ساتھ ساتھ اب وہ مردوں کی بے حرمتی بھی کرنے لگا، لوگ تنگ آگئے اور انہوں نے کہنا شروع کر دیا کہ تجھ سے اچھا تو تیرا باپ تھا کم ازکم کفن ہی چوری کیا کرتا تھا مردوں کی بے حرمتی تو نہیں کرتا تھا۔

اگر ماضی کے حکمران چور تھے تو عوام کہتی ہے کہ ٹھیک ہے وہ چور ہوں گے لیکن ان کے دور میں ایسی ”انی“ نہیں پڑی تھی جیس اب پڑی ہوئی ہے ہر چیز عوام کی پہنچ سے دور ہے۔ اگر ماضی کے حکمران چور تھے تو چینی، آٹا، چاول، گندم، پیٹرول،دوائیاں، بجلی اور اور گیس کی قیمتیں کنٹرول میں تھیں لیکن اب چونکہ ایمانداری کا دور دورہ ہے تو قیمتیں بھی بڑھ گئیں ہیں۔ اس لئے عوام یہ کہنے میں حق بجانب ہیں ان ایمانداروں سے تو چور ہی بھلے تھے۔

پاکستان تحریک انصاف کی حکومت کو عددی لحاظ سے جتنی مضبوط اور عملی طور پر جنتی کمزور اپوزیشن ملی ہے شاید پاکستان میں ماضی میں گزرنے والی کسی حکومت کوایسی اپوزیشن میسر نہیں آئیں۔ تیل کی قیمتیں بڑھ جائیں، آٹا عوام کی پہنچ سے دور ہو جائے، چینی لوگوں کو دستیاب نہ ہو،خوردنی تیل مہنگا ہو جائے، دوائیاں عوام کی استطاعت سے باہر ہو جائیں، بجلی کے نرخ بڑھ جائیں،گیس کا بل زیادہ ہو جائے دیگر اشیا  خورونوش کی قیمتیں آسمان کو چھو جائیں لیکن ان کے کان پر جوں تک نہیں رینگتی۔