عمران خان اپنی حکومت کے دوران مسلسل ایک ہی بات پر زور دے رہے ہیں کہ لوٹا ہوا مال ہر حال میں واپس لاؤں گا۔چوروں ، ڈاکوں اور لٹیرے سیاست دان کا محاسبہ کروں گا اور انہیں کسی قیمت پر این آر اور نہیں دونگا۔

عوامی مسائل پر جب بھی بات ہوتی ہے تو عام طور پر وزیر اعظم اور حکومتی اراکین کا کہنا یہ ہوتا ہے کہ مہنگائی ، بے روزگاری، غربت جیسے ابدی مسائل کی جڑ نواز اور زرداری کی لوٹ مار ہے، انہوں نے اربوں روپے کی کرپشن کی اور کرپٹ پیسہ غیرقانونی طور پر پاکستان سے باہر لے گئے۔

وزیر اعظم حکومتی وزراء اور برسراقتدار جماعت کی اکثریت کیا چاہتی ہے۔لوئی ہوئی رقیم کی واپسی ۔ یہ بات تو سمجھ آگئی ، مگر غلام کیا چاہتے ہیں اس پر کیا کسی کی توجہ ہے؟

کیا کسی طاقت ور حکومتی فرد نے یہ جاننے کی کوشش کی ہے کہ عوام ان کے بیانیے سے مطمعن ہیں؟ اور عوام کیا یہ ہی چاہتے ہیں۔میرے نزدیک سچ مختلف ہے، پاکستان کے عوام کرپشن اور لوٹ مار کے خلاف ضرور ہیں مگر وہ اصل میں اپنی معاشی سماجی زندگی میں بہتری چاہتے ہیں۔ عوام کے ازل سے دشمن آج پہلے سے زیادہ طاقت ور دکھائی دے رہے۔عوام چاہتے ہیں کہ مہنگائی میں کمی، بے روزگار کے مواقع اور غربت کا خاتمہ ۔

تحریک انصاف حکومت کی اب تک سب سے بڑی ناکامی  اسی عوامی خواہشات کے برعکس ہیں ۔2018 میں ایک کروڑ افراد کا روزگار متاثر ہوا تھا اور 2020 تک ایک اندازے کے مطابق اڑھائی کروڑ افراد بے روزگار ہوئے ہیں یا ان کا روزگار متاثر ہوا ہے۔

نیا پاکستان بنانے والی حکومت کے آنے سے پاکستانیوں کی فی کس آمدنی میں 6.1 فیصد کمی ہوئی ہے۔16 فیصد ملکی کل پیداوار(جی ڈی پی) میں کمی ہوئی ہے۔2018 کی جی ڈی پی 315ارب ڈالر سے کم ہو کر 2020 میں 264 ارب ڈالر ہوگئی ہے، یوں ملک سے 51 ارب ڈالر پیداوار کم ہوئی ہے۔

روپے کی قدر میں 45فیصد تک کمی آنے سے مہنگائی کا سیلاب اور طوفان  دونوں اکھٹے آگئے ہیں۔35 روپے کلو گندم دو برسوں میں 60 سے 70 روپے فی کلو تک پہنچ گئی ہے۔چینی 55 روپے سے 100 روپے کلو ہوئی۔گزشتہ 8برسوں میں پاکستان میں ریکارڈ توڑ مہنگائی دیکھنے میں آئی ہے۔

جس دن وزیر اعظم اعلان کرتے ہیں  کہ مہنگائی کم ہو رہی ہے اس کے اگلےہی روز پیٹرول کی قیمتوں میں اضافہ ہوا ہے۔ملکی تاریخ میں پہلی مرتبہ 2ماہ کے عرصے میں پیٹرول ، ڈیزل اور مٹی کے تیل کی قیمتوں میں 6 دفعہ اضافہ کیا گیا۔بجلی کی قیمتیں آسمان سے باتیں کر رہی ہیں۔15 فیصد بجلی کی قیمت میں اضافہ ہوچکا ہے اور 15 فیصد مزید متوقع ہے۔16 فیصد گیس کی قیمت میں اضافے کی تجویززیر التوا ہے۔افراط زر 8 فیصد سے بڑھ کر 10 فیصد پر چلاگیا ہے۔

سب سے بڑا ظلم یہ ہے کہ کھانے پینے کی اشیاء کی قیمت میں 14 فیصد کے لگ بھگ اضافہ جاری ہے۔مہنگائی نے پیداواری لاگت نہایت بڑھا دی ہے۔بھارت بنگلہ دیش سری لنکا جیسے ممالک کے مقابلے میں پاکستان کی پیداواری لاگت کم ہونے سے پاکستان برآمدات کرنے کی صلاحیت سے محروم ہو  رہا ہے اور اسی وجہ سے اندرونی اور بیرونی سرمایہ کاری بھی جمود کا شکار ہیں۔

لوٹی ہوئی دولت واپس لانے کا عزم کرنے والی حکومت کو یہ اعزاز بھی حاصل ہے کہ ملکی تاریخ میں پہلی مرتبہ کپاس کی پیداوار میں 38 فیصد کمی ہوئی ہے۔ جس سے پہلی مرتبہ گندم ، چینی اور کپاس درآمد کرنا پڑے گی۔کیا افسوسناک بات ہے کہ زرعی ملک کو گندم چینی اور کپاس بھی اب ڈالروں سے خریدنا پڑے گی۔

کہانی مہنگائی پر ختم نہیں ہوتی، کرپشن لوٹ مار ختم کرنے والی حکومت کے دور میں بین الاقوامی ادارے کے مطابق کرپشن میں اضافہ ہوا ہے۔2018 میں 117 درجے تھی جو کرپشن کے اضافے سے 2019 میں 120 ہو گئی۔اور 2020 تک کرپشن میں مزید اضافے سے 124 تک جا پہنچے۔

عوام تو کرپشن لوٹ مار کا خاتمہ چاہتے تھے، ان کا خیال ہے کہ ان کا خاتمہ ہوگا تو مہنگائی بے روزگاری اور غربت بھی اپنی موت آپ مر جائے گی۔مگر پاکستانی عوام کے ساتھ عجیب مذاق ہوا ہے ، نہ تو لوٹی ہوئی دولت اب تک واپس آئی ہے ، کرپشن میں ہم اورپر چلے گئے ہیں  اور مہنگائی  بے روزگاری  غربت بانس کی طرح تیزی سے بڑھ رہے ہیں۔