ہر آنے والا دن حکومت کی نااہلی اور بے بسی کی نئی داستان رقم کرجاتاہے۔یہ تو بھلا ہواپوزیشن کا کہ وہ ان سے بڑھ کر نالائق اور داغدارماضی کی حامل ہےکہ حکومتی نااہلیوں کےباوجود عوام ان کا ساتھ دینے کو تیارنہیں۔عمران خان صاحب کا سب سےبڑانعرہ کرپشن فری پاکستان تھا۔آج بھی وہ ہرتقریر"نہیں چھوڑوں گا" کا نعرہ ضرورلگاتے ہیں۔تحریک انصاف حکومت بنے پونے تین سال گزرچکے لیکن اس سیاسی نعرے کےعملی نتائج اب تک نہیں پیدا ہو سکے۔سزا یافتہ ہونے کے بوجود نواز شریف بغرض علاج لندن بھجوا دیئے گئے۔اب وہ ایک نامعلوم پیچیدہ مرض کوجوازبنا کر لندن میں قیام پذید ہیں۔پی ڈی ایم کی تحریک کے دوران نواز شریف کےآن لائن خطابات سن کرذرا بھی محسوس نہیں ہوتا کہ یہ وہی شخص ہے جوچل اوربول بھی نہیں سکتاتھا۔اب وہاں لندن سے بیٹھ کر ملکی اداروں سےمتعلق دھمکی آمیز زبان استعمال کر رہا ہے۔ شاید لندن کی آب و ہوا ہی ایسی ہے۔سیاسی پناہ گزین اپنے ہی ملک کے مفادات اوراداروں کے خلاف بول کرآقاؤں کو خوش کرتے رہتے ہیں۔اندیشہ ہےکہ مسلم لیگ ن کےقائد نواز شریف کا یہ چلن انھیں ایم کیوایم کے بانی الطاف حسین کے راستےپرنہ لے جائے۔ بقول سینئر صحافی رؤف کلاسرا، نواز شریف اپنی پہلی جلاوطنی کے دوران بھی انقلاب کا منجن بیچتے رہے ہیں۔پہلے یہ گفتگو ڈرائنگ روم کی حد تک تھی اب یہ تذکرےاورزبان برسرعوام کی جا رہی ہے۔

حیرت کی بات یہ ہے جس دوران یہ "انقلابی"تقریریں کی جارہی تھیں اسی دوران مسلم لیگ ن کےرہنما محمد زبیرانھی اعلیٰ فوجی حکام سے بات چیت میں مصروف تھےجو نواز شریف کےنشانے پرتھے۔حیرت ہے کہ کچھ نادان لوگ ہرباراس انقلابی کے جھانسے میں آجاتے ہیں اورمیڈیا پر بیٹھ کرمعصوم عوام کوگمراہ کرتےہیں۔ جس طرح نواز شریف کے انقلاب کا نعرہ ایک سراب ہے۔اسی طرح جو یارلوگ عمران خان کے احتساب کے نعرے کو سچ سمجھتےہیں وہ ایک خود فریبی کےمرض میں مبتلا ہیں۔ چینی ، آٹا، ادویات اور پیٹرول اسکینڈل میں ملوث مافیاز عمران حکومت کاحصہ ہیں۔کیا کسی بھی ملوث فردکاعہدےسے ہٹایا جانا کافی ہے؟عوام کی جیبوں پر ڈاکہ ڈالنے والے طاقتورمافیا قانون سےبالاتر ہیں؟عمران خان صاحب نے چینی پر سٹہ اورمنی لانڈرنگ کی تحقیقات کوآگے بڑھا نےکا فیصلہ کیاہے۔ حکومتی ترجمانوں کی جانب سےایک لسٹ پبلک کی گئی ہے۔جس میں سیاسی خاندانوں کے ساتھ کاروباری افرادکےنام بھی سامنے آئے ہیں۔اس لسٹ میں اکثریتی سیاسی خاندانوں اوران کے رشتہ داروں کا تعلق تحریک انصاف سے ہے۔ باقی شریف فیملی اوران کے متعلقین ہیں۔سیاسی لڑائی اپنی جگہ لیکن مالی مفادات کے معاملے میں سب ایک ہیں۔عمران خان صاحب نے اپنا سیاسی قد مزید اونچا کرنے کے لئے شوگرمافیا کے خلاف قانونی کارروائی کا آغاز تو کروادیا ہے۔ پہلے سبسڈی کے ساتھ چینی باہر بھجوا کرمہنگی کروائی گئی۔پھر سبسڈی دے کر وہی چینی واپس منگوائی گئی۔ کیاعمران خان صاحب ان لوگوں کے خلاف کارروائی کریں گے جنھوں نےغلط فیصلوں کے ذریعے سینکڑوں ارب روپے کی سبسڈی دی۔یہ فیصلے کرنے والے اب بھی ان کی کابینہ میں بیٹھے ہیں۔جب تک اشرافیہ کےمفادات کےمحافظ ان کے ارد گرد بیٹھے ہیں تب تک یہ کارروائیاں نتیجہ خیز ہوتی نظر نہیں آتیں۔چینی مافیا کی سامنےآنے والی لسٹ میں سب زیادہ نشانے پرجہانگیر ترین ہیں۔بادی النظر میں لگتا ہےکہ جہانگیرترین کومیڈیا ٹرائل کا نشانہ بنا کر کسی اور بات کی سزا دینے کی کوشش کی جا رہی ہے۔

جس طرح پانامہ کرپشن کیس میں 450 سے زائد افراد کے نام سامنے آئےتھے لیکن میڈیا ٹرائل صرف نواز شریف کا ہوا۔ جہانگیر ترین نے بھی اس معاملے سے سیاسی طور پر نمٹنے کی تیاری کر لی ہے۔ تحریک انصاف کےناراض اورغیر مطمئن ارکان اسمبلی کو اپنے گھر جمع کر کےحکومت کو پیغام دیا ہے کہ وہ اس کے لئے مشکل کا سبب بن سکتے ہیں۔یہ پوری سیاسی اشرافیہ کارویہ ہے کہ وہ اپنے اوپرکرپشن الزامات کا قانونی جواب دینے کی بجائے اسےسیاسی مسئلہ بنانے کی کوشش کرتے ہیں۔ پی ڈی ایم کی پوری تحریک کے پس منظرمیں بھی مسلم لیگ ن ، پیپلز پارٹٰی اور جے یو آئی ف کی جانب سے قیادت پر کرپشن کیسز میں ریلیف حاصل کرنا تھا۔ جس میں وہ جزوی طور پر کامیاب بھی ہوئے ہیں۔اب حکومتی وزارءاورترجمانوں کے بیانات سے لگ رہا ہے کہ انھیں جہانگیر ترین کی سیاسی حرکیات سے مسئلہ ہو رہاہے۔لیکن اس کا انحصار اس بات پرہو گا کہ مقتدرطاقتیں مستقبل میں جہانگیرترین کوکوئی اہم کام سونپنا چاہتے ہیں؟ کیونکہ انفرادی سطح  پر ان سے لودھراں کی سیٹ جیتنا بھی مشکل کام ہے۔ البتہ اپنے وسائل کی بنیاد پروہ ایک عمل انگیز (کیٹالسٹ) شخص ہیں۔اشاروں پر موجود افرادکوجہازکی مفت سیربھی کراتےہیں ۔

تحریک انصاف کے لئے ان کی خدمات کسی سےڈھکی چھپی نہیں ہیں۔اس موقع کو غنیمت جان کے پیپلزپارٹی کی جانب سے جہانگیر ترین کے حق میں بیانات کوئی حیرت کی بات نہیں۔ پیپلزپارٹی کی پنجاب میں دوبارہ جگہ بنانےکی خواہش اسے کسی بھی سطح تک لےجاسکتی ہے۔بزدار سرکار کی جانب سے جنوبی پنجاب کا سیکرٹریٹ ختم کرنےکے اثرات ظاہر ہونا شروع ہو چکے ہیں۔عمران خان کو بھی ان کی صوبائی حکومت کی غلطی کا احساس ہو گیاہے۔اس لئے عثمان بزدار سے وضاحت طلب کرنے کے ساتھ ساتھ جنوبی پنجاب کی غیر مطمئن پارلیمانی قیادت کے مسائل حل کرنے کا حکم جاری کیاگیاہے۔افسوس اس بات کا ہے کہ یہ کام عوامی خدمت کی ترجیحات کی بجائے سیاسی مجبوریوں کے تحت کیا جارہا ہے۔مبارک ہو نیاپاکستان بھی اشرافیہ کے ہاتھوں یرغمال بن چکا ہے۔