لاہور : محکمہ موسمیات نے ملک کے مختلف شہروں میں بارش کی پیشگوئی کر دی۔ محکمہ موسمیات کے مطابق ملک کے بیشتر علاقوں میں موسم گرم اور خشک رہنے کا امکان ہے تاہم ملک کے کئی شہروں میں بارش متوقع ہے۔

صوبائی دارالحکومت لاہور میں بادلوں کا راج ہے اور گرمی کا زور ٹوٹ گیا ہے۔ شہر کا درجہ حرارت 29 ڈگری سینٹی گریڈ تک پہنچ گیا ہے۔ تاہم آئندہ 24 گھنٹوں میں بارش امکانات ظاہر کئے گئے ہیں۔ تشویشناک بات یہ ہے کہ لاہور شہر فضائی آلودگی کے اعتبار سے دوسرے نمبر پر براجمان ہے۔ شہر میں فضائی آلودگی کی مجموعی شرح 163 ریکارڈ کی گئی ہے۔

محکمہ موسمیات کے مطابق شمال مشرقی پنجاب اور کشمیر کے کچھ علاقوں میں تیز ہواؤں کے ساتھ گرج چمک اور بارش کا امکان ہے۔ اسلام آباد اور گردونواح میں موسم خشک اور گرم رہنے کا امکان ہے۔ مشرقی پنجاب میں اکثر مقامات پر بارش کا امکان ظاہر کیا گیا ہے۔ 

مری، گلیات، جہلم، گجرات، منڈی بہاؤالدین اور گوجرانوالہ میں بارش ہونے کی توقع ہے۔ سیالکوٹ، نارووال، شیخوپورہ، ننکا نہ صاحب، لاہور اور قصور میں بارش کا امکان ہے جبکہ اوکاڑہ، ساہیوال اور فیصل آباد میں چند مقامات پر گرج چمک کے ساتھ بارش کی متوقع ہے۔

محکمہ موسمیات نے بلوچستان اور سندھ کے بیشتر اضلاع میں موسم گرم اور خشک رہنے کا امکان ظاہر کیا ہے۔ محکمہ موسمیات کا کہنا تھا کہ خیبر پختونخوا کے بالائی اضلاع میں مطلع جزوی طور پر ابر آلود رہیں گے،گلگت بلتستان میں موسم خشک اور مطلع جزوی ابر آلود رہنے کا امکان ہے، اس کے علاوہ آزاد کشمیر میں چند مقامات پر تیز ہواؤں اور گرج چمک کے ساتھ بارش کی پیشگوئی ہے۔

کوئٹہ : پاکستان میں رواں سال کا 18واں پولیوکیس کوئٹہ میں رپورٹ ہوا ہے۔نیشنل ایمرجنسی آپریشن سینٹر (این ای او سی) نے تصدیق کی ہے کہ کوئٹہ میں رواں سال کا دوسرا اور بلوچستان کا 13واں پولیو کا کیس سامنے آیا ہے۔ اس کیس کے سامنے آنے کے بعد صوبے میں پولیو کے پھیلاؤ پر گہری تشویش ظاہر کی جا رہی ہے۔ 

وزیراعظم کی فوکل پرسن برائے انسداد پولیو عائشہ رضا فاروق نے اس واقعے پر شدید تشویش کا اظہار کرتے ہوئے کہا ہے کہ بلوچستان کے کچھ علاقوں میں پولیو مہم میں رکاوٹوں کی وجہ سے وائرس پھیلنے کا موقع ملا ہے۔ انہوں نے کہا کہ پولیو وائرس کے پھیلاؤ کو روکنے کے لیے ہم اپنی کوششیں دوگنا کر رہے ہیں۔

عائشہ رضا فاروق نے مزید کہا کہ ہر بچے کو پولیو ویکسین کی متعدد خوراکیں لگانا انتہائی ضروری ہے۔ انہوں نے والدین سے اپیل کی ہے کہ وہ اپنے بچوں کو پولیو جیسے موذی مرض سے بچانے کے لیے انہیں پولیو ویکسین لگوائیں۔

واشنگٹن : امریکا کی مرکزی بینک نے 4 سال میں پہلی بار شرح سود میں کمی کر دی ہے۔ 

امریکی مرکزی بینک نے اچانک شرح سود میں 50 بیسس پوائنٹس کی کمی کا اعلان کر کے عالمی مالیاتی منڈیوں میں ہلچل مچا دی ہے۔ یہ فیصلہ تجزیہ کاروں کی پیش گوئیوں سے کہیں زیادہ بڑا ہے اور اس سے قبل جولائی 2023 سے فیڈ فنڈ ریٹ 5.25 سے 5.50 فیصد پر برقرار تھا۔

فیڈرل ریزرو بینک کی جانب سے اپنے بینچ مارک فیڈرل فنڈز کی شرح کو 4.75 فیصد سے 5 فیصد تک کم کرنے کا فیصلہ افراط زر کے خلاف اس کی جنگ میں ایک اہم موڑ کی نشاندہی کرتا ہے۔

فیڈرل ریزرو بینک کے سربراہ جیروم پاول نے نامہ نگاروں سے بات کرتے ہوئے کہا شرح سود میں کمی کا یہ فیصلہ ہمارے بڑھتے ہوئے اعتماد کی عکاسی کرتا ہے۔

امریکی مرکزی بینک کے اس فیصلے کی وجہ مہنگائی میں کمی اور بڑھتی ہوئی بے روزگاری کو بتایا جا رہا ہے۔ ماضی میں سخت مانیٹری پالیسی کے نتیجے میں مہنگائی کم ہوئی تھی لیکن اس کے ساتھ ساتھ نئی ملازمتوں کے مواقع بھی کم ہوئے۔ امریکی حکام نے بڑھتی ہوئی بے روزگاری پر تشویش کا اظہار کیا تھا جس کے بعد یہ فیصلہ لیا گیا۔

ماہرین کا کہنا ہے کہ امریکی مرکزی بینک کا یہ فیصلہ عالمی معیشت کے لیے مثبت پیش رفت ہے۔ شرح سود میں کمی سے امریکہ میں قرض داروں کو ریلیف ملے گا اور سرمایہ کاری میں اضافہ ہوگا۔ اس سے دیگر ممالک میں بھی شرح سود کم ہونے کا امکان ہے۔اس کے علاوہ امریکی ڈالر کمزور پڑ سکتا ہے جو کہ درآمدی ممالک کے لیے فائدہ مند ہے۔