پاکستان تحریک انصاف کے چیئرمین عمران خان لانگ مارچ میں شرکت کے بعد اسلام آباد سے واپس پشاور پہنچ گئے۔

عمران خان خیبرپختونخوا سے لانگ مارچ کی قیادت کرتے ہوئے اسلام آباد پہنچے تھے۔

 معاون اطلاعات خصوصی خیبرپختونخوا بیرسٹر محمد علی سیف کے مطابق سابق وزیراعظم عمران خان لانگ مارچ ختم ہونے کے بعد واپس پشاور پہنچے ہیں، ان کے ہمراہ شہباز گل اور دیگر پارٹی رہنما بھی ہیں۔

وفاقی حکومت نے پیٹرولیم منصوعات کی قیمتوں میں 30 روپے فی لیٹر اضافے کا اعلان کردیا۔

اسلام آباد میں پریس کانفرنس کرتے ہوئے وفاقی وزیر خزانہ مفتاح اسماعیل نےکہا کہ پہلے دن سے کہہ رہا ہوں کہ پیٹرولیم مصنوعات کی قیمتوں میں اضافہ ناگزیر ہے، حکومت نے پیٹرول، ڈیزل اور کیروسین آئل کی فی لیٹر قیمت میں 30 روپے اضافےکا فیصلہ کیا ہے، پیٹرولیم مصنوعات کی نئی قیمتوں کا اعلان آج رات 12 بجے سے ہوگا۔

مفتاح اسماعیل نےکہا کہ قیمت میں اضافےکے بعد ایک لیٹر پیٹرول 179.86روپےکا ہوجائےگا، ایک لیٹر ڈیزل 174.15 روپے اور لائٹ ڈیزل 148.31 روپےفی لیٹر ہو جائےگا، جس قیمت پر ڈیزل مل رہا ہے، اس سے 56 روپےکم پردے رہے ہیں، مٹی کاتیل 155.56 روپے فی لیٹر ہوگا۔

 وفاقی وزیر خزانہ کا کہنا تھا کہ سابقہ حکومت میں فروری تک پیٹرول اور ڈیزل کی قیمت میں ہوش ربااضافہ ہوا، جب ان کی حکومت جانے لگی تو بارودی سرنگیں بچھا کر چلے گئے، سابقہ حکومت نے پیٹرول اور ڈیزل کی قیمت کو فکس رکھا، پہلے دن سےکہہ رہا تھاکہ عوام پر کچھ نہ کچھ بوجھ ڈالناناگزیر ہے۔

ان کا کہنا تھا کہ سول حکومت چلانےکا خرچہ 42 ارب اور سبسڈی سوا سو ارب روپے ہے،  15 دن میں 55 ارب روپےکا نقصان برداشت کرچکے ہیں، جب تک پیٹرول کی قیمت نہیں بڑھائیں گے آئی ایم ایف قرض نہیں دےگا، عمران خان فارمولے پر جاؤں تو ڈیزل 305 روپے کا ہوگا، پیٹرول کی قیمت نہیں بڑھا رہے تھےتو روپیہ گر رہا تھا۔

پارلیمنٹ کے مشترکہ اجلاس سے خطاب کرتے ہوئے  خواجہ آصف نے کہا کہ  یاسین ملک کو سزا سنائے جانے پر قومی اسمبلی اور سینیٹ میں قراردادیں پاس کیں، ان قراردادوں کی بہت زیادہ اہمیت ہے، اب مشترکہ اجلاس میں قرار داد پاس کریں گے۔

وزیر دفاع  نے کہا کہ یکجہتی کا پیغام دنیا کو جارہا ہے کہ پاکستان کشمیریوں کے ساتھ کھڑا ہے، گزشتہ 4 سال کشمیریوں کے لیے ایل او سی کے اس طرف سے کوئی ٹھنڈا جھونکا نہیں گیا۔

خواجہ آصف نے کہا کہ یاسین ملک کو سزا سنائی گئی، پہلے علی گیلانی اس دنیا سے رخصت ہوگئے، پچھلے چار سال ہم سیاسی اور اقتدار کی جنگوں میں مصروف رہے۔

انہوں نے کہا کہ کشمیریوں کو بھارتی آئین میں جو لولا لنگڑا اسٹیٹس ملا وہ بھی لے لیا گیا، جس کاز کے لیے ہم نے تین جنگیں لڑیں اس کا مذاق اڑایا گیا۔

خواجہ آصف نے کہا کہ کشمیرسے کمٹمنٹ کا 4 سال میں حکومتی سطح پر کوئی اظہار نہیں ہوا، امریکا گئے اور کہا 92 کے کپ سے بڑی فتح حاصل کی۔