حکومت کا بڑا ریلیف: گھریلو صارفین کے بجلی بلوں سے الیکٹریسٹی ڈیوٹی ختم کرنے کا فیصلہ

وفاقی حکومت نے گھریلو صارفین کے لیے بجلی کے بلوں میں شامل الیکٹریسٹی ڈیوٹی ختم کرنے کا بڑا فیصلہ کر لیا ہے، جو جولائی 2025 سے نافذ العمل ہوگا۔ اس اقدام کے بعد صوبائی حکومتیں بجلی کے بلوں کے ذریعے یہ ڈیوٹی وصول کرنے کی مجاز نہیں ہوں گی۔

وفاقی وزیر توانائی سردار اویس لغاری نے اس فیصلے کے حوالے سے چاروں صوبوں کے وزرائے اعلیٰ کو باقاعدہ خط ارسال کیا ہے۔ خط میں کہا گیا ہے کہ بجلی کے بلوں میں مختلف وفاقی و صوبائی ٹیکسز اور چارجز کی بھرمار نے صارفین کو شدید الجھن اور معاشی دباؤ میں مبتلا کر رکھا ہے، جس کا خاتمہ حکومت کی اولین ترجیح ہے۔

اویس لغاری نے اپنے خط میں زور دیا کہ حکومت چاہتی ہے کہ بجلی کے بل صرف استعمال شدہ بجلی کی قیمت پر مشتمل ہوں، نہ کہ غیر ضروری چارجز، ڈیوٹیز یا ٹیکسز پر۔ انہوں نے اس فیصلے کو بلنگ نظام میں شفافیت لانے اور عوامی اعتماد کی بحالی کی جانب ایک اہم پیش رفت قرار دیا۔

وفاقی وزیر نے مزید بتایا کہ حکومت بجلی کی قیمتوں میں کمی کے لیے بھی سرگرم ہے۔ مہنگے پاور پرچیز معاہدوں (IPPs) پر نظرثانی جاری ہے، جبکہ سرکاری بجلی گھروں کے ریٹرن آن ایکویٹی میں کمی کے لیے بھی اقدامات کیے جا رہے ہیں، تاکہ صارفین کو زیادہ سے زیادہ ریلیف فراہم کیا جا سکے۔

اویس لغاری نے صوبائی حکومتوں کو تجویز دی ہے کہ اگر وہ الیکٹریسٹی ڈیوٹی کسی متبادل طریقے سے جاری رکھنا چاہتی ہیں، تو اس کے لیے علیحدہ اور شفاف طریقہ کار تجویز کریں، تاکہ بجلی کے بل آسان، سادہ اور صرف بجلی کے اصل استعمال پر مبنی ہوں۔

انہوں نے اعادہ کیا کہ موجودہ حکومت ایک ایسا شفاف، واضح اور صارف دوست بلنگ سسٹم متعارف کرانے کے لیے پُرعزم ہے جو غیر ضروری مالی بوجھ سے پاک ہو۔