وزیراعلیٰ پنجاب کا جیلوں میں خالی آسامیوں پر بھرتیوں کا اعلان

وزیراعلیٰ عثمان بزدار کی زیر صدارت اعلیٰ سطح کا اجلاس ہوا جس میں پریزن ریفارمز پیکیج پر عملدرآمد کے حوالے سے پیش رفت کا جائزہ لیا گیا۔

اجلاس میں عثمان بزدار نے کہا کہ جیلوں میں خالی آسامیوں پر بھرتی کا عمل جلد شروع کیا جائے۔ بھرتیاں 100 فیصد میرٹ پر ہوں گی۔

انکا کہنا ہے کہ جیلوں کے اسپتالوں میں میڈیکل افسروں کی بھرتیاں جلد شروع کی جائیں جبکہ میڈیکل افسروں کو علیحدہ کیڈر میں تعینات کیا جائے گا اور خصوصی الاؤنس بھی دیا جائے گا۔

وزیراعلیٰ عثمان بزدار نے پریژن ریفارمز پیکیج پر عملدرآمد مزید تیز کرنے کی ہدایت دی ہے۔

عثمان بزدار نے کہا کہ سابق حکومتوں نے قیدیوں کو سہولتیں دینے پر کوئی توجہ نہیں دی، قیدیوں کے ساتھ ماضی میں سوتیلی ماں جیسا سلوک ہوتا رہا۔

انہوں نے مزید کہا کہ ہماری حکومت نے قیدیوں کو ان کے بنیادی حقوق دینے کیلئے تاریخ ساز پریزن ریفارمز پیکیج دیا ہے اور قیدیوں کو معیاری کھانے کی فراہمی کیلئے 500 ملین روپے کی منظوری دے دی ہے، اچھا کھانا قیدیوں کا حق ہے جو انہیں دیں گے۔

واضح رہے کہ اجلاس میں وزیراعلیٰ پنجاب عثمان بزدار نے جیل فاؤنڈیشن کے فنڈز کو قیدیوں کی فلاح وبہبود کیلئے استعمال میں لانے کی ہدایت دے دی ہے۔