پارلیمنٹ ہاؤس کے باہرسیاسی گرماگرمی ، لیگی رہنماؤں اور پی ٹی آئی کارکنوں میں ہاتھا پائی

تفصیلات کے مطابق مسلم لیگ ن کے رہنما شاہد خاقان عباسی پارلیمنٹ ہاؤس کے باہر دیگر رہنماؤں کے ہمراہ میڈیا سے گفتگو کر رہے تھے کہ اس دوران پی ٹی آئی کے کارکنان ہاتھوں میں پلے کارڈز اٹھائے وہاں پہنچ گئے اور مسلم لیگ ن کے خلاف نعرے بازی کی  اور پی ٹی آئی کارکنان نے لیگی  اراکین اسمبلی کو گھیرے میں لے لیا ۔پی ٹی آئی کارکنوں اور ن لیگی رہنماؤں کے درمیان تلخ جملوں کا تبادلہ ہوا اور نوبت ہاتھا پائی تک آپہنچی ۔ مسلم لیگ ن کے رہنما مصدق ملک اور کارکنوں  کو   ایک دوسرے کو دھکے دئیے گئے۔ پی ٹی آئی والوں نے مریم اورنگزیب کو گھیرے میں لےلیا جبکہ شاہدخاقان نے پی ٹی آئی کارکن کوتھپڑ جڑدئیے ۔ سیکورٹی اہلکاروں نے شاہد خاقان عباسی اور احسن اقبال سمیت رہنماؤں  کو گھیرے میں لےلیا۔

قومی اسمبلی میں اعتماد کے ووٹ سے قبل میڈیا سے بات کرتے ہوئے سابق وزیراعظم شاہد خاقان عباسی  نے کہاکہ پاکستان تحریک انصاف (پی ٹی آئی) والے صرف بدمعاشی کر سکتے ہیں   ۔ ہم اسمبلی کے اندر اور باہر ان کا مقابلہ کریں گے ،  ان کو اخلاقی تربیت کی ضرورت نہیں ان کا لیڈر ایسا ہی ہے۔   انہوں نے کہا کہ   پاکستان کی عوام نے اپنا مینڈیٹ دے دیا ہے اور اب وزیر اعظم کے پاس اکثریت ہے نہ بات کرسکتے ہیں۔ حکومت غیر قانونی اجلاس بلا کر چوری کیساتھ اعتماد کا ووٹ لینے کی کوشش کررہی ہے۔ رات  گئے اندھیرے میں نوٹی فکیشن جاری ہوا جس میں کہا گیا کہ وزیراعظم آرٹیک 91 کی شق 7 کے تحت اعتماد کا ووٹ لے گا، آرٹیکل 91 کی شق 7 یہ کہتی ہے کہ جب صدر کو یقین ہو جائے گا کہ وزیراعظم اعتماد کھو چکے تو وزیراعظم کو اعتماد کا ووٹ لینے کا کہے گا،آج کے وزیراعظم کے پاس اکثریت نہیں صرف بدمعاشی کر سکتا  ہے ہم یہ سارا تماشا دیکھ رہے ہیں ۔ صدر، وزیراعظم اور اسپیکر غیر قانونی اور غیر آئینی اجلاس بلانے میں ملوث ہیں اور عوام کو دھوکا دینے کی کوشش کی جا رہی ہے ، ہم ان غنڈوں کا مقابلہ کریں گے۔

شاہد خاقان عباسی نے مزید کہا کہ ملک کا صدر بتائے کہ اس نے عمران خان کے کان یا ٹیلی فون میں کہا کہ تمھاری اکثریت ختم ہو چکی ہے ، انھوں نے کس قانون کے تحت یہ غیر قانونی اجلاس بلایا ہے  جنھوں نے ملک کو لوٹا اس سے آج عوام سوال کر رہی ہے، کوئی وزیراعظم خود اعتماد کا ووٹ نہیں لے سکتا، آئین کے تحت جب صدر مطمئن ہو جائے تو وزیراعظم کو اعتماد کا  ووٹ لینے کا مطالبہ کرتا ہے ۔