بالائی علاقوں کی سیر کا پلان کچھ دنوں کیلئے مؤخر کردیں، فواد چوہدری کی عوام سے اپیل

تفصیلات کے مطابق سماجی رابطے کی ویب سائٹ ٹوئٹر پر جاری ایک بیان میں  وفاقی وزیرِ اطلاعات و نشریات فواد چوہدری   کا کہنا ہے کہ مری اور دیگر بالائی مقامات کے لیے ایک جم غفیر رواں دواں ہے ، لاکھوں گاڑیاں ان علاقوں کی طرف جا رہی ہیں اور  مقامی انتظامیہ کے لیے اتنی بڑی تعداد میں لوگوں کو سہولتیں پہنچانا ناممکن بن گیا ہے ۔

مری اور دیگر بالائ مقامات کیلئے ایک جم غفیر رواں دواں ہے لاکھوں گاڑیاں ان علاقوں کی طرف جارہی ہیں مقامی انتظامیہ کیلئے اتنی بڑی تعداد میں لوگوں کو سہولیات پہنچانا ناممکن بن گیا ہے، جو لوگ ابھی گھروں میں ہیں ان سے درخواست ہے بالائ علاقوں کی سیر کا پلان کچھ دنوں کیلئے موخٓر کر دیں

— Ch Fawad Hussain (@fawadchaudhry) January 8, 2022

انہوں نے  مزید کہا کہ جو لوگ ابھی گھروں میں ہیں ان سے درخواست ہے بالائی علاقوں کی سیر کا پلان کچھ دنوں کیلئے مؤخر کردیں ۔ 

واضح رہے کہ محکمہ موسمیات کی جانب سے مری، گلیات اور آزاد کشمیر اور گرد و نواح میں بارش، برف باری اور طوفان کی پیش گوئی کی  گئی ہے، 50 سے 90 کلومیٹر فی گھنٹہ کی رفتار سے تیز ہواؤں کے ساتھ طوفان آ سکتا ہے  جس کے دوران شدید برف باری کا امکان ہے۔

دوسری جانب بارشوں اور برفباری سے گلیات میں معمولات زندگی مفلوج ہوکر رہ گئی ہے۔  شدید برف باری کے باعث ہزاروں سیاح پھنس کر رہ گئے جس کے بعد اسلام آباد سے مری جانے والے راستے بند کردیے گئے۔ 

ضلعی انتظامیہ راولپنڈی کے مطابق مری میں اب تک 27 ہزار سے زائد گاڑیاں داخل ہوچکی ہیں اور مزید گاڑیاں داخلے کی منتظر ہیں، سیاحوں کو نتھیا گلی،ڈونگہ گلی،ایوبیہ اور ٹھنڈیانی جانے سے روک دیا گیا ہے ۔

 گلیات ڈویلپمنٹ اتھارٹی کی مشینری  برف ہٹانے میں مصروف ہیں ،  مری میں مزید سیاحوں کو داخل نہیں ہونے دیں گے، يہ فيصلہ مری ميں سياحوں کے رش اور ٹريفک جام کو مدِنظر رکھتے ہوۓ کيا گیا ہے۔