نئے سال کا پہلا ہفتہ بھی مہنگا ، ادارہ شماریات  کی رپورٹ جاری 

ادارہ شماریات کی جانب سے جاری ہفتہ وار مہنگائی کے اعداد و شمار کے مطابق ہفتہ وار مہنگائی میں 0.08 فیصد اضافہ ہوا ہے ۔ رواں ہفتے 25 اشیائے ضروریہ کی قیمتوں میں اضافہ ہوگیا ، چکن ،سبزیاں،پٹرولیم مصنوعات سمیت کئی اشیاء مہنگی ہو گئیں۔ 

ایک ہفتے کے دوران آلو کی فی کلو قیمت میں اوسط 2 روپے 17 پیسے کا اضافہ ہوا جبکہ دال مسور کی فی کلو اوسط قیمت میں 3 روپے 23 پیسے، دال مونگ ایک روپے 76 پیسے، دال ماش 3 روپے 82 پیسے اور دال چنا 2 روپے 30 پیسے فی کلو مزید مہنگی ہو گئی۔

رپورٹ کے مطابق حالیہ ہفتے چینی کی فی کلو اوسط قیمت میں 62 پیسےکا اضافہ ہوا جبکہ آگ جلانے والی لکڑی فی من قیمت 6 روپے 49 پیسے اضافے کے بعد 795 روپے 63 پیسے ہو گئی ۔

حالیہ ہفتے بیف کی اوسط فی کلو قیمت ایک روپے 96 پیسے، مٹن 8 روپے 16 پیسے فی کلو مہنگا ہوا، زندہ مرغی کی فی کلو قیمت میں اوسط 8 روپے 96 پیسے کا اضافہ ہوا۔

ایل پی جی کے گھریلو سلنڈر کی قیمت میں 23 روپے 35 پیسے کمی آئی جبکہ پٹرول کی فی لیٹر قیمت میں 4 روپے تک اضافہ ہوا ہے ۔

اعداد و شمار کے مطابق ایک ہفتے کے دوران 7 اشیائے ضروریہ کی قیمتوں میں کمی آئی، ٹماٹر کی اوسط فی کلو قیمت میں 10 روپے 08 پیسے کمی ہوئی ، انڈوں کی فی درجن قیمت 4 روپے 19 پیسے کم ہوئی۔

آٹا، چاول اور سرخ مرچ کی قیمت میں بھی کمی آئی۔ ادارہ شماریات کے مطابق حالیہ ہفتے  بریڈ،بچوں کے پینے کا دودھ،کپڑوں سمیت19 اشیاء کی قیمتوں میں استحکام رہا۔