دبئی میں کھیلے جا رہے انڈر19 ایشیا کپ میں پاکستان نے بھارت کو جیت کے لیے 282 رنز کا ہدف  دے دیا، اس سے قبل پاکستان نے ٹاس جیت کر پہلے بیٹنگ کرنے کا فیصلہ کیا تھا۔

پاکستان کی جانب سے عثمان خان اور شاہ زیب خان نے اچھی  اننگز کا آغاز کرتے ہوئے درمیان 160 رنز کی شاندار شراکت داری بنائی۔

160 کے مجموعی اسکور پر عثمان خان 60 رنز بنا کر کیچ آؤٹ ہو گئے۔

پاکستان کی جانب سے  شاہ زیب خان نے شاندار بیٹنگ کا مظاہرہ کرتے ہوئے سنچری اسکور کی، انہوں نے دس چھکوں اور پانچ چوکوں کی مدد سے شاندار 159 رنز بنائے۔

جبکہ دیگر کھلاڑیوں میں ریاض اللہ نے 27 ہارون ارشد 3 فہیم الحق 4 سعد بیگ 4 اور فرحان یوسف بنا کوئی رنز بنائے پویلین لوٹ گئے۔

بھارت کی جانب سے سمرتھ ناگراج نے 3، آیوش مہاترے نے 2 جبکہ کرن چورملے نے ایک وکٹ حاصل کی۔

چیئرمین پی سی بی محسن نقوی کا کہنا ہے کہ چیمپئنز ٹرافی سے متعلق بہت سی باتیں چل رہی ہیں، پاکستان اور بھارت نے اپنی اپنی تجاویز آئی سی سی کے سامنے رکھ دی ہیں۔

اپنے بیان میں ان کا کہنا تھا کہ اگر ہائبرڈ ماڈل کے علاوہ کوئی اور ماڈل بنا تو فیصلہ برابری کی بنیاد پر ہوگا،یہ نہیں ہوسکتا کہ ہم بھارت جائیں اور بھارت پاکستان نہ آئے،یہ نہیں ہوسکتا کہ بھارت کی ہر بات مانی جائے۔

بھارتی میڈیا کے مطابق پاکستان نے یہ شرط عائد کی ہے کہ آئندہ بھارت میں ہونیوالے آئی سی سی ایونٹس میں پاکستان کیلئے بھی ہائبرڈ ماڈل ہوگا۔ اگر بھارت پاکستان میں نہیں کھیلے گا، تو پاکستان کیلئے بھی وہی فارمولا ہونا چاہیے۔

ان کا کہنا تھا کہ یہ نہیں ہوسکتا کہ یہ چیمپئنز ٹرافی کیلئے ہو بلکہ مستقبل میں بھی عملدرآمد ہوگا۔

دوسری جانب بھارتی میڈیا کا کہنا ہے کہ پی سی بی نے آئی سی سی چیمپئنز ٹرافی کےلیے ہائبرڈ ماڈل پر مشروط رضامندی ظاہر کردی۔

پی سی بی نے شرط رکھی ہے کہ بھارت کے سیمی فائنل اور فائنل میں نہ آنے کی صورت میں یہ میچز پاکستان میں ہی ہوں گے۔ یو اے ای میں ہونیوالے میچز کی گیٹ منی سے اماراتی بورڈ پی سی بی کو حصہ دے گا۔

ضلع خیبر کے مختلف علاقوں کے عمائدین نے حکومت پاکستان اور سیکورٹی فورسز کی مکمل حمایت کا یقین دلاتے ہوئے اس عزم کا اعادہ کیا ہے کہ کسی فرد یا عنصر کو امن خراب کرنے کی اجاز ت نہیں دی جائے گی۔

اس عزم کا اظہار قلعہ بالا حصار پشاور میں ہونے والے خصوصی گرینڈ جرگہ کے دوران کیا گیا جس میں ضلع خیبر کے عمائدین، نوجوانوں، سینئر سول اور فوجی افسران نے شرکت کی۔ عمائدین نے کہا کہ وہ ضلع خیبر میں امن کیلئے حکومت اور سیکورٹی فورسز کے ساتھ فتنہ الخوارج کے خلاف کردار ادا کرتے رہیں گے۔

شرکاء کو بتایا گیا کہ پاک فوج، فرنٹیئر کور نارتھ اور قانون نافذ کرنے والے ادارے ضلع خیبر میں امن کی بحالی کے لیے برسرپیکار ہیں اور کسی فرد یا گروپ کو ضلع کا امن خراب کرنے کی اجازت نہیں دی جائے گی۔ حکام نے مقامی عمائدین سے کہا کہ وہ اس بات کو یقینی بنائیں کہ وہ علاقے میں حکومت پاکستان اور اس کے ماتحت اداروں کے ساتھ فتنہ الخوارج کے خلاف متحرک ہیں ۔ لنڈی کوتل، جمرود، باڑا اور وادی تیرا کے عمائدین نے جرگہ میں شرکت کی اور متعدد تجاویز پیش کیں۔

عمائدین کا کہنا تھا کہ اس طرح کے جرگے علاقے میں امن کا واضع پیغام ہیں۔