اسلام آباد پولیس کا اپنے بہادر ،نڈراور غیور افسران کو خراج تحسین پیش کرنے کے لئے پر وقار تقریب کا انعقاد کیا جس میں اسلام آباد پولیس کے تمام ڈویژنز کے افسران نے شرکت کی ۔

آئی جی اسلام آباد سید علی ناصر رضوی نے وفاقی دارالحکومت میں امن و امان کے قیام کے لئے بے مثال بہادری اور لازوال قربانیاں پیش کرنے والے افسران کو خراج عقیدت پیش کیا اور کہا کہ میرے تمام افسران نے 72گھنٹے شاہراہ پر موجود رہ کر اس شہر کے باسیوں کے امن کو قائم رکھا اور شرپسندوں کے مذموم عزائم کو ناکام بنایا۔

پولیس ترجمان کے مطابق اسلام آباد پولیس نے حالیہ امن و امان کی صورتحال کے دوران بھرپور بہادر ی اور شجاعت کا مظاہرہ کرنے والے اپنے بہادر ،نڈراور غیور پولیس افسران کو خراج تحسین پیش کرنے کے لئے پولیس لائنز ہیڈکوارٹرز میں پر وقار تقریب کا انعقادکیا۔

تقریب میں انسپکٹر جنرل آف پولیس اسلام آباد سید علی ناصر رضوی نے بطور مہمان خصوصی شرکت کی جبکہ ڈی آئی جی اسلا م آباد سید علی رضا،ڈی آئی جی ہیڈکوارٹرز /سکیورٹی محمد جواد طارق ،تمام اے آئی جیز ، ایس ایس پیز اور ایس پیز سمیت تمام ڈویژنز کے پولیس افسران موجود تھے۔

آئی جی اسلا م آباد سید علی ناصر رضوی نے وفاقی دارالحکومت میں امن وامان کے قیام کے لئے بے مثال بہادری اور لازوال قربانیاں پیش کرنے والے پولیس افسران کو خراج عقیدت پیش کرتے ہوئے کہا کہ مجھے فخر ہے کہ میں ایک بہادر فورس کا کمانڈر ہوں، مجھے اسلام آباد پولیس میں اپنے فرا ئض کو ادا کرنا ہمیشہ یاد رہے گا ، پولیس فورس میں موجود ہر افسراللہ کی طرف سے چناہو ا اور متعین کردہ ہے ،آ پ افسران نے اللہ کے ساتھ کئے گئے وعدہ کی تجدید کرتے ہوئے لوگوں کے جان و مال کو محفوظ بنایا اور شرپسندوں کو ان کے مذموم عزائم میں ناکام بنایا۔

اسلام آباد پولیس بہادری اور شجاعت کی مثالیں قائم کرتے ہوئے تمام پولیس فورسز میں ممتاز ٹھہری اور ان کے لئے مشعل راہ بنی۔ آئی جی اسلام آباد نے پولیس فورس میں موجود افسران کے متعلق ذکر کرتے ہوئے کہا کہ میرے یہ افسران پورے پاکستان سے چنے ہوئے پھولوں کے گلدستہ کی مانند ہیں،میرے تمام افسران پورے پاکستان کے علاقوں کی ثقافت ،جرت اور بہادری کی نمائندگی کرتے ہیں ،آپ سب نے اپنے اساتذہ، والدین، اپنے کمانڈراور اس شہر کے باسیوں کا سر فخر سے بلند کیا ہے۔

انہوں نے کہا کہ میری فورس نے اپنے شہریوں کی خدمت اور ان کی حفاظت کے ساتھ شہر میں امن و امان کے قیام کے لئے بھرپور بہادری کا مظاہرہ کیا۔میرے تمام افسران چاہے وہ ایگزیکٹیو اسٹاف ہو یا منسٹریل اسٹاف تمام میدان عمل میں موجود رہے اور دن رات 72گھنٹوں شاہراں پر موجود رہ کر اس شہر کے باسیوں کے امن کو قائم رکھا اور کسی شہری کے جان ،مال اور املاک کو نقصان نہ پہنچنے دیا۔

انہوں نے مزید کہا کہ میرے تمام افسران کو اس بہادری اور شجاعت کی ہمت اللہ کی طرف سے عطاہوئی ،تمام پولیس افسران اور قانون نافذکرنے والے اداروں کے افسران نے ایک خاندان کی طرح کام کرتے ہوئے شرپسند عناصر کی وفاقی دارالحکومت پر چڑھائی کو ناکام بنایا۔

پی پی پی چیئرمین بلاول بھٹو زرداری کا پارٹی کے یومِ تاسیس پر پیغام میں کہنا تھا کہ کار کنا ن، سپورٹرز اور عوام کو پیپلز پارٹی کے یوم تاسیس کی مبارکباد دیتا ہوں۔
بلاول نے کہا کہ یہ دن جمہوریت، سماجی انصاف اور عوام کو با اختیارابنانے کے اصولوں سےپارٹی کی 57 سالوں پرمحیط غیر متزلزل وابستگی کا مظہر ہے، قائدِ عوام شہید ذوالفقار علی بھٹو اور انکی لازوال میراث کو خراج عقیدت پیش کرتا ہوں، قائدِ عوام نے مساوات، انسانی حقوق اور معاشی خوشحالی کے اصولوں پر مبنی ایک مساوی معاشرہ کے قیام کے لیے پارٹی بنائی،شہید محترمہ بینظیر بھٹو کی قربانیوں کو بھی خراج عقیدت پیش کرتا ہوں۔
  بلاول بھٹو زرداری کا کہنا تھا کہ بی بی شہید نے جمہوریت کے لیے بے مثال بہادری کا مظاہرہ کیا، شہید محترمہ بینظیر بھٹو نے اپنی انتھک جدوجہد سے لاکھوں افراد کو متاثر کیا، پاکستان کی سیاسی تاریخ تشکیل دینے میں پیپلز پارٹی کا کردار کلیدی رہا ہے،شہید بھٹو کی دوراندیش قیادت میں، پارٹی نے قوم کو پہلا جمہوری آئین دیا، 1973 کا آئین تمام شہریوں کے مساوی حقوق اور نمائندگی کو یقینی بناتا ہے۔

بلاول بھٹو زرداری کا مزید کہنا تھا کہ صدر آصف علی زرداری کے پہلے دورِ میں حکومت نے مساوات کے اصولوں سے اپنی غیر متزلزل وابستگی کا عملی مظاہرہ کیا،صدر آصف زرداری کے پہلے دور میں تاریخی 18ویں ترمیم کے ذریعے صوبائی خودمختاری کو مضبوط بنایا،صدر زرداری کے پہلے دور میں بینظیر انکم سپورٹ پروگرام کا آغاز کیا گیاجو لاکھوں مستحق شہریوں کی زندگیوں کو بہتر بنا چکاہے، پیپلز پارٹی ہمیشہ محروم طبقوں کی آواز، مزدوروں اور کسانوں کے حقوق کی محافظ رہی ہے۔

انہوں نے کہا کہ پیپلز پارٹی خواتین اور اقلیتوں کو با اختیار اور مضبوط بنانے کی حامی رہی ہے،اپنی قیام سے لے کر آج تک، پیپلز پارٹی ایک پرامن، ترقی پسند اور خوشحال پاکستان کی جدوجہد میں ثابت قدم رہی ہے، پیپلز پارٹی کے کارکنان کی ثابت قدمی اور وفاداری ہمیشہ بے مثال رہی ہے، پارٹی کی طاقت اور کامیابی کی بنیاد جیالے ہیں،آج پارٹی کے بنیادی اصولوں سے وابستگی کا اعادہ کرتے ہوئے ظلم، ناانصافی اور عدم مساوات کے خلاف جدوجہد جاری رکھنے کا عزم کرتے ہیں۔

سابق وزیر خارجہ کا کہنا تھا کہ قائد عوام نے جوہری پروگرام کا آغاز کیا جو ملک کی دفاعی صلاحیتوں کا سنگ بنیاد بنا، پیپلز پارٹی نےزرعی زمین کی تقسیم، مزدوروں کے حقوق اور تعلیم میں انقلابی اصلاحات متعارف کرائیں، پیپلز پارٹی کی متعارف کردہ اصلاحات سماجی ترقی کی بنیاد بنیں، بی بی شہید مسلم اکثریتی ملک کی پہلی خاتون وزیرِاعظم بن کر جمہوریت کو مضبوط کیا،بی بی شہید نے خواتین کو بااختیار بنایا، سماجی فلاح و بہبود کو فروغ دیا،شہید محترمہ بینظیر بھٹو نے ملک میں میزائل ٹیکنالوجی کی ترقی میں بھی قیا د ت فراہم کی۔

وزیراعلیٰ پنجاب مریم نواز شریف کا کہنا ہے کہ سیکیورٹی اہلکاروں پر بے رحمانہ تشدد کرنے والوں کو نہیں چھوڑیں گے۔

انہوں نے یہ بات سی ایم ایچ راولپنڈی کے دورہ کے دوران کہی، وزیرا علیٰ پنجاب نے پرتشدد احتجاج میں رینجرز اور پولیس کے زخمی اہلکاروں کی عیادت کی اور ان کی فرض شناسی کی تعریف بھی کی۔

واضح رہے کہ وزیراعلیٰ پنجاب کو زخمی اہلکاروں نے احتجاج کے دوران تشدد کے بارے میں بتایا۔ ایک زخمی اہلکار نے کہا کہ مظاہرین کے تشدد سے بیشتر پولیس اہلکاروں کی ہڈیاں ٹوٹ گئیں۔