ضلعی انتظامیہ  اور این سی او سی ٹیمز کی ایس او پیز کی خلاف ورزی کرنے والوں کیخلاف مشترکہ کارروائیاں 

تفصیلات کے مطابق ضلعی انتظامیہ اور این سی او سی ٹیمز کی ایس او پیز کی خلاف ورزی کرنے والے کے خلاف مشترکہ کارروائیاں جاری ہیں ۔ اسسٹنٹ کمشنر انڈسٹریل ایریا اور این سی او سی ٹیمز نے مختلف مارکیٹس کا اچانک دورہ کیا۔

اسسٹنٹ کمشنر انڈسٹریل ایریا کا کہنا ہے کہ  ایس او پیز کی خلاف ورزی پر متعدد دوکانیں اور ریسٹورنٹس سیل کردئے گئے ہیں۔ سیل کی گئی دوکانوں اور ریسٹورنٹس پر  بھاری جرمانیں عائد کئے گئے۔ ایس او پیز کی خلاف ورزی پر ایچ ایٹ فور پوسٹ گریجویٹ کالج بھی سیل کردیا گیا ہے۔

نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  پاکستان  میں کورونا سے اموات کی مجموعی تعداد 29ہزار162تک پہنچ گئی ہے ۔ ملک میں ایک روز کے دوران کورونا وائرس کے مزید7ہزار سے زائد کیسز سامنے آئے ہیں ،  وائرس کے کُل مریضوں کی تعداد 13 لاکھ 93ہزار 887ہو چکی ہے۔

ملک میں مثبت کیسز کی شرح 11 اعشاریہ 91فیصد تک  پہنچ گئی  ، جبکہ  کوروناکے1240مریضوں کی حالت تشویشناک ہے ۔ گزشتہ 24 گھنٹوں میں ملک میں کورونا وائرس کے مزید 63 ہزار 272ٹیسٹ کیے گئے۔