ماہ رمضان میں عوام کو ریلیف فراہم کرنے کیلئے حکومت کا اہم اقدام

تفصیلات کے مطابق  وزیر اعلیٰ پنجاب کی ہدایت پررمضان پیکج کیلئے سفارشات تیار کرنے کیلئے قائم کمیٹی کااجلاس ہوا، اس اجلاس میں  وزیر صنعت میاں اسلم اقبال،  چیف سیکرٹری پنجاب نے شرکت کی۔رمضان بازاروں میں اشیاء کی رعائتی  نرخوں پر فراہمی کیلئے مختلف تجاویز پر غور کیا گیا۔

ماہ رمضان میں عوام کو زیادہ سے زیادہ ریلیف فراہم کرنے کیلئے پنجاب حکومت نے آٹا، چینی، سبزیوں سمیت منتخب اشیاء ضروریہ پر سبسڈی فراہم کرنے کیلئے خصوصی پیکج کی تیاری پر کام شروع کردیا۔صوبائی وزراء اور محکموں کے سیکرٹریز کو رمضان بازاروں کی مانیٹرنگ کے فرائض تفویض کرنے کا فیصلہ کرلیا گیا۔

میاں اسلم اقبال کا کہنا ہے کہ   عام آدمی کو زیادہ سے زیادہ ریلیف فراہم کرنے کیلئے ہر ممکن اقدامات کئے جائیں گے، رمضان پیکج کے لئے سفارشات کو جلداز جلد حتمی شکل د ی جائے، صوبے میں رمضان بازار شعبان کے آخری ہفتے میں فعال ہونگے۔

چیف سیکرٹری نے ہدایت کی ہے کہ صارفین کو ریلیف کی فراہمی کیلئے رمضان بازاروں میں بہترین انتظامات کئے جائیں، رمضان بازاروں کی مانیٹرنگ کیلئے جدید ٹیکنالوجی کو بروئے کار لایا جائے۔