حکومت کا تعلیمی ادارے 2 ہفتے کے لیے بند کرنے کا اعلان

نیشنل کمانڈ اینڈ آپریشن سینٹر (این سی اوسی) اجلاس کے بعد وزیر تعلیم شفقت محمود کے ہمراہ پریس کانفرنس کرتے ہوئے وزیر اعظم عمران خان کے معاون خصوصی برائے صحت ڈاکٹر فیصل سلطان نے کہا کہ اجلاس میں کورونا وائرس کے بڑھتے کیسز اور ایس او پیز کے بارے میں گفتگو کی گئی، تفریحی مقامات، ہوٹل، شادی ہال اور دیگر انڈسٹریز کی بحالی پر بھی مشاورت کی گئی۔ ان کا کہنا تھا کہ پاکستان میں کورونا کیسز کی شرح بڑھ رہی ہے ، گزشتہ ہفتہ کے دوران کویڈ کیسز میں اضافہ ہوا ،شہری گھر سے باہر ماسک لازمی پھنیں ،گھر سے 50 فیصد عملے کی کام کرنے کی پالیسی کی حمایت کرتے ہیں ۔ 

ڈاکٹر فیصل سلطان نے کہا کہ دفاتر میں پچاس فیصد حاضری پر دوبارہ اتفاق کیا گیا ہے، تفریحی پارک ملک بھر میں شام 6 بجے بند کرنے کا فیصلہ کیا گیا ہے۔انہوں نے کہا کہ بند مقامات پر تقریبات کی اجازت نہ دینے کا فیصلہ کیا گیا ہے، پابندی 15 مارچ سے 15 اپریل تک پابندی برقرار رہے گی، تاہم نظرثانی کرکے 12 اپریل کو مزید فیصلے کیے جائیں گے۔

اس موقع پر وفاقی وزیر تعلیم شفقت محمود نے کہا کہ 5کروڑ بچے سکولز ، کالجز ، یونیورسٹیز میں جاتے ہیں ، سارے پاکستان میں صورتحال کا جائزہ لیا گیا ، سندھ ، بلوچستان میں حالات ٹھیک ہیں ، وہاں 50 فیصد بچے روز آئیں گے ۔ 

شفقت محمود نے کہا کہپنجاب ، کے پی میں کہیں کہیں مسائل نظر آئے ہیں ،  لاہور، فیصل آباد، گوجرانوالہ، گجرات، ملتان، راولپنڈی اور سیالکوٹ میں 15 مارچ سے بہار کی چھٹیوں کا اعلان کیا جا رہا ہے جبکہ اسلام آباد کے تعلیمی ادارے بھی پیر سے دو ہفتے کے لیے بند ہوجائیں گے، اس کے علاوہ پشاور اور مظفر آباد میں بھی تعلیمی ادارے 15 سے 28 مارچ تک بند رہیں گے۔