ای سی سی اجلاس، رمضان ریلیف پیکج کی منظوری دے دی گئی

 تفصیلات کے مطابق وزیر خزانہ عبدالحفیظ شیخ کی زیر صدارت اقتصادی رابطہ کمیٹی کا اجلاس ہوا جس میں ای سی سی  (اقتصادی رابطہ کمیٹی) کی جانب سے رمضان ریلیف پیکج کی منظوری دے دی گئ ہے۔رمضان پیکیج کے تحت یوٹیلیٹی سٹورز پر 19 اشیائے ضروریہ پر سبسڈی دی جائے گی،پیکج کے تحت یوٹیلٹی سٹورز کو 7 ارب 80 کروڑ روپے دئے جائیں گے۔

ایم ڈی یو ایس سی  کے مطابق رمضان کیلئے اشیائے ضروریہ کی خریداری کا عمل یکم اپریل سے شروع کیا جائے گا، یوٹیلیٹی سٹورز پر آٹے، چینی اور گھی سمیت اشیائے ضروریہ مارکیٹ سے سستی فراہم کی جائیں گی۔ رمضان پیکیج ملک کے تمام 4 ہزار سے زائد آئوٹ لیٹس پر دستیاب ہوگا۔

دوسری جانب اجلاس میں پاور سیکٹر سبسڈیز پر نظرثانی کی سمری بھی منظور کرلی گئی ہے، وزارت تعلیم کے کورونا سے متعلق منصوبے کیلئے ایک ارب 5 کروڑ کی گرانٹ منظور کی گئی ہے جبکہ کم لاگت گھروں کی تعمیر کیلئے ڈیڑھ ارب روپے ،امن دستوں میں تعینات سول آرمڈ فورسز کے اہلکاروں کی تنخواہوں کیلئے 33 کروڑ ، فیڈرل انشورنس محتسب دفتر کیلئے 3.15 کروڑ ، نیشنل شپنگ کارپوریشن کیلئے 96.85 لاکھ ، کیبنٹ ڈویژن کیلئے 6.73 کروڑ  اور سینٹرل کاٹن کمیٹی کیلئے 41.9 کروڑ کی گرانٹ منظور کی گئی ہے۔

ای سی سی کی یو ایس سی کو اشیائے ضروریہ کی خریداری کیلئے بروقت فنڈز فراہم کرنے کی ہدایت کر دی گئی ہے۔ اجلاس میں ایگری ٹیک اور فاطمہ فرٹیلائزرکو مارچ سے نومبر 2021ء تک یوریا کی پیداوار کیلئے کو آپریٹ گیس کی اجازت دے دی گئ ہے جبکہ ای سی سی نے محفوظ سرنجز کے استعمال بارے سمری کی بھی منظوری دیدی اور فوڈ ایگریکلچر آرگنائزیشن کیلئے 10 گاڑیوں کی ڈیوٹی فری درآمد کی بھی منظوری دیدی گئی ہے۔

اجلاس میں طور خم بارڈر سے خام کپاس کی درآمد کی منظوری بھی دے دی،ای سی سی کی آئل مارکیٹنگ کمپنیوں کے مارجن کو کور افراط زر کے 85 فیصد کی بنیاد پر نظر ثانی کی اجازت دی گئی ہے۔